Loneitute kawng zawh tum avangin Delhi leh UP ramriah khapna siam ve leh
India rama loneitu pawl hrang hrangte'n lungawi lohna lantira Delhi pana kawng zawh an tum lo dang turin Uttar Pradesh leh Delhi inkar ramriah pun khawm khap a ni a, CrPC section 144 an puan thu Delhi Police chuan an sawi.
Delhi police-te hian Shahadara leh Gandhi Nagar chhehvelah section 144 hi hman tel tur a nih thu an sawi a, pun khawm khapna dan hi March 12 thleng hman tur a ni. Delhi police thuchhuah chuan,"Loneitu pawl ṭhenkhatte'n MSP leh an thil phut dangte a hlawhtlin theih nana kawng zawh tum thlawpna zawngin thu an chhuah a, Delhi ramriah pun khawm an tum a ni. Buaina a chhuah loh nan leh boruak muanawm a awm reng theih nan, CrPC section 144 hi inven nan kan puang a ni" tiin an tarlang.
Delhi leh UP ramri, hmarchhak lam district hnuaia awm zawng zawngah pun khawm khapna hi kalpui tur a ni a, Delhi -ah hian tractor, bus, truck leh sumdawn nana hman lirthei bakah, mimal lirthei, sakawr bakah, nawrh huaihawtnaa tel tur phurtu lirthei zawng zawngte chu an luh khapsak an ni. Mi tu pawh, nawrh huaihawtnaa tel chuan, ralthuam, puak thei, chem, fei, leh midang hliam nana hman theih hmanruate an kawl phal a ni lo bawk tiin Delhi police hian thuchhuahah an tarlang bawk.
Hetih lai hian Punjab leh Haryana ramriah pawh loneitu, Delhi pan tumte dan nan hian ruahmanna siam a ni bawk a, Ambala, Jind leh Patehabad district-ah te chuan mihring luh chhuah theih lohin ramri hi dan a ni. Delhi luhna tur ramri tinah hian police 1,500 vel dah vek an nih thu Delhi police commissioner, Sanjay Arora chuan a sawi.
Loneitute hian sorkar laipui hnenah an thlai thar khulsakna man, Minimum Support Price (MSP) nghet neihna atan dan siam an phut bakah, 2021-a nawrh an huaihawt laia thubuai siamte sut sak leh, loneitute tana pension siam bakah Swaminathan commission rawtna hman te an phut bawk a ni. Sorkar laipui hian loneitute nawrh tur dan nan hian inbiakna neih an duh thu an lo sawi tawh a, nimin khan loneitute pawl aiawh ṭhenkhatte leh union minister pathum, Arjun Munda, Nityanand Rai leh Piyush Goyal te chuan inbiakna an nei a, he thu buatsaih lai thleng hi chuan thutlukna thar an siam hriat a la ni lo.