Qatar-in Indian Navy pariat a mante chhuah

Enthlatua puh an nih avanga Qatar sorkarin Indian Navy bang tawh, Qatar-a hnathawk mi pariat, thi tura an chungthu a rel tawhte chu nimin khan a chhuah zalen.

Sorkar laipui chuan hemi chungchangah hian thuchhuah siamin,"India sorkar chu Qatar-a Dahra global company-a thawk, India mi pariat, man tawkte chhuah zalen an nih avang hian a lawm hle a, an zinga mi pasarih hian India an rawn thleng tawh a ni. Qatar Emir of the state chungah he thutlukna siam avang hian lawmthu kan sawi e," tiin an tarlang. India an rawn thlen hnu hian Navy-te hian prime minister Narendra Modi leh a kaihhruai sorkar chungah an lawm thu an sawi. Chhuah an nih tur thu an hriat lawk bik loh thu leh, thla 18 zet an tan hnua an zalen ta chu Prime Minister hnathawh vang liau liau niin an tarlang.

Qatar-in Indian Navy pariat, an rama hnathawk a mante chhuah an nih theih nan hian Ministry of External Affairs chuan Qatar sorkar chu inbiakna a neihpui reng a, Prime Minister Modi pawhin Dubai-a COP28 summit neih a nih lai khan Qatar Emir, Sheikh Tamim bin Hamad Al-Thani chu inbiakna a neihpui bawk a ni.

Indian Navy pariatte hi Indian Navy aṭanga an ban hnuah Qatar-ah hian ralthuam siamnaah thawkin, August 2022 khan Qatar Emir Naval force hman tur, tuihnuai lawng, Italian U212 stealth siam tur an buaipui laiin enthlatua puh niin man an ni. Hun rei tak tan ina dah an nih hnuah nikum October thla khan thi tura an chungthu relsak an ni. Hemi hnu hian India sorkar chuan Qatar sorkar hnenah ngenna siam ve lehin, December 28, 2023 khan thi tura an chungthu relna chu sutin, hun rei zawk tang tura hrem an nih leh a, ThawhṬanni khan chhuah zalen an ni leh ta a ni.