Rahul Gandhi-a'n UP-a Bharat Jodo Nyay Yatra a hun hmain titawp

Congress chuan Thawhṭanni khan Uttar Pradesh-a Bharat Jodo Nyay Yatra hun hmang mek, Rahul Gandhi-a'n pawl 10 leh pawl 12 board exam avanga ruahman dan ang aia a hun hman tur a tihtawp hma dawn thu an sawi.

Uttar Pradesh-a Congress thupuangtu, Anshu Awasthi chuan,"Rahul Gandhi hian entawntlak takin mipui ṭhatna tur zawk ngaihpawimawhna hi a lo lantir tawh ṭhin a ni. UP-a board exam ṭan hun tur chu February 22 a ni tih hre chungin, UP-ah hian Yatra hi February 16 aṭanga February 21 thleng kalpui a ni ang, hei hi ruahman dan sa aiin a tawi zawk a ni," tiin, West Bengal-ah pawh Covid-19 avanga mipuite a ngaihtuahna lamah a kawng zawh tur a lo tihtawp tawh thu a sawi. UP-ah hian Bharat Jodo Nyay Yatra hi February 26 thleng hman tura ruahman a ni.

Awasthi hian UP-a Yatra kalpui dan tur ruahmanna hi puang nghalin, February 16-ah Varanasi khawpui luta bul ṭan a nih tur thu te, hemi hnuah Bhadohi, Pragyaraj leh Pratapgarh paltlangin, February 19-ah Amethi an lut dawn tih a sawi. Amethi aṭang hian a tukah Rae Barelli pan a ni leh ang a, Lucknow lam kal lehin hetah hian zan an riak ang. UP-a Yatra tawpna hi Jhansi-ah hman a nih tur thu a sawi bawk.