Sorkar laipui leh loneitute inbiakna hlawhchham; Loneitute'n Delhi panin kawng an zawh

Loneitu pawl hrang hrang intel khawmte'n Delhi pana nawrh huaihawt an tum chungchanga sorkar laipuia minister-te nen inbiakna an neih chu a hlawhchham.

Thawhlehni khan Chandigarh-ah sorkar laipui aiawhte nena inbiakna hi darkar ruk zet nei mah se, inremna siam thei loin an ṭin. Inbiakna a hlawhchham tak avangin nimin khan loneitute hian Delhi panin nawrh huaihawt kawng zawh an nei a ni.

Loneitute hian sorkar laipui chu inbiakna an neihnaah an ti tak tawk lo nia sawiin, Punjab hmun hrang hrang aṭanga Delhi pan tura tractor leh trolley an inring ṭhup tawh chung pawha sorkarin chuan an thil phutte a ngaihsak ṭha tawk loa an hriat thu an sawi. Loneitu pawl hruaitute zinga mi chuan sorkarin inremna tura a rawtte chu pawl anga an ngaihtuah phawt tur thu leh, tun dinhmunah sorkar chu thiam lo zawk a ni tiin, an nawrh tum an kaltlangpui tur thu a sawi.

Chandigarh-a an inbiaknaah hian Electricity Act, 2020 hlihna turah inremna siam niin, Uttar Pradesh-a Lakhimpur Kheri hmuna thil thleng avanga loneitute chhungte hnena zángnadawmna pek tur pawh pawm a ni. Kum 2021-a farm law dodalnaa loneitu ṭhenkhat laka FIR theh luh hnuk kir tur pawhin inremna neih a ni bawk. Sorkar hotute leh loneitu pawl hruaitute hi heng thilah hian inrem mah se, tuna an thil phut ber, Minimum Support Price (MSP) neihna tura dan siam chungchang te, MS Swaminathan Commission rawtna hman leh loneitute tana pension siam chungchangah inremna nei thei loin inbiakna hi an titawp.

Rei tak nawrh huaihawt turin inbuatsaih

Loneitu pawl hrang hrang, sorkar laipui hnen aṭanga an thil phut nawrna atana nimina Delhi pana kawng zawhte chu Delhi lut thei loin Delhi ramriah dan an ni. Loneitute erawh chuan khawi hmunah pawh rei tak nawrh huaihawt thei tura an inpuahchah thu an sawi.

Diesel leh ei tur, thla khat aia tam daih an ken thu loneitute hian an sawi a, an thil phutte a hlawhtlin hma chu an lungawi lohna lantir an tum thu leh, sorkar pawhin engtianga rei nge an daih tih enchhin kher tum lo se an duh tih an sawi. "Kan trolley-ah hian hriau aṭanga tuboh thlengin kan mamawh tur zawng zawng kan dah. Lung paltlang tur pawhin kan inpeih a, thla ruk daih tura inbuatsaihin mahni khua kan chhuahsan hlawm a ni," tiin, Punjab-a loneitu pakhat, Harbhajan Singh chuan Haryana aṭanga an unau loneitu kal vete tan pawh an pai kep vek thu a sawi bawk.

Police-te chuan loneitu kawng zawhte'n Delhi an luh theih loh nan hian Delhi ramri zawng zawngah venhimna khauh tak an kalpui mek a, lirthei te dapin, lirthei tlan dan tharte ruahman lailawk a ni bawk. State dang aṭanga Delhi luhna kawngpui pawimawh awmna, Ghazipur, Tikri leh Singhu-ah pawh concrete block-in kawngpui dan a ni a, lirthei tlan luih tumte dan nan kawngpuiah perek phan vek a ni.

Ramri khar leh internet tihtawp vangin petition theh lut

Haryana sorkarin Delhi pana loneitute kawng zawh tur dan nana mobile internet a titawp leh, ramri kawngpui a dan avangin Punjab and Haryana high court-ah petition theh luh a ni.

Petition theh luttu hi Uday Pratap Singh a ni a, internet service tihtawp a nih avang hian Haryana bakah, Punjab sorkar leh sorkar laipuite chu hma la dik loa puhin high court hnenah hian sorkar thutlukna chu stay turin a phut. Singh hian internet tihtawp chu constitution leh fundamental rights kalh a nih thu a sawi bawk.

Singh hi Haryana-a Panchkula mi a ni a, sorkar thuneitute'n ramri an khar dan chu dan kalh a nih thu sawiin, dikna chanvo an neih ang ngeia loneitute'n pun khawm an tum dan nana ramri khar a ni chu India danpui kalh tlat a ni tiin, kawngpui dan chuan mipui nawlpui tan harsatna a siam bakah, ambulance leh sikul bus zawng zawng tan pawh harsatna a tlin thu a tarlang.