Rahul Gandhi-a'n PM hnenah lehkha thawn

Congress party hruaitu, Rahul Gandhi chuan West Bengal sorkar hnena Mahatma Gandhi National Rural Employment Guarantee Scheme (MGNREGS) fund pek tur, sorkar laipuiin a la kawl tan sak chu pe chhuak vat turin prime minister Narendra Modi hnenah lehkha thawnin a ngen.

Rahul Gandhi hian a lehkhaah hian West Bengal tana fund pek chhuah tur kawl tan a nih avanga an MGNREGS hnuaia hnathawkte hlawh tur pawh pek theih a nih loh thu sawiin, Bharat Jodo Nyay Yatra avanga West Bengal a awm laia, MGNREGS hnathawktu pawl aiawh, Paschim Banga Jhet Mazdoor Samity-a mite chuan an harsatna thlena amah an rawn hmuh thu a tarlang bawk.

Gandhi hian MGNREGS hnuaia thawktute harsatna a tarlan bakah,"Kan unau tam takte chu MGNREGS kaltlanga sorkar laipuiin a fund pek tur kawl tan a nih avangin hna leh hlawh pe loin kan siam a, 2022 aṭang khan sorkar laipui hian West Bengal tana MGNREGS sum hi a pe chhuak tawh lo a ni. 2021-a hnathawkte pawhin an thawh hlawh hi vawiin thlengin an la lo niin ka hre bawk," tiin a sawi.

Heng bakah hian MGNREGS hnuaia in tin aṭanga hnathawk chu 2021-2022 chhunga nuai 75 an tlin laiin, 2023-2024-ah chuan in 8,000 chauh a ni tawh niin a sawi a, hnathawktu zat tlahniam chu hmeichhia, ST leh SC te'n an tuar zual niin a sawi bawk. Gandhi chuan heng thil zawng zawng hi MGNREGS sum sorkar laipuiin a pek chhuah loh vanga thleng a nih thu a sawi.

"Kum 18 kal ta khan UPA sorkar chuan khawtlang ṭhatna atan leh mi rethei, a bikin thingtlang khuate tana kawng hawnna atan he hmalakna hi a kalpui a, MGNREGS hi mi tam tak tan eizawnna a tling hman a ni. Heng zawng zawng ngaihtuah chung hian, sorkar laipui hian West Bengal-a MGNREGS hnuaia hnathawkte hlawh a la batsakte pein, hnathawh tur pawh hi ngaihtuah chhunzawmsak ngei se ka duh," tiin Gandhi chuan a lehkha thawnah hian a sawi a ni.