Loneitute leh sorkar laipuiin inbiakna neih leh tum

India rama loneitu pawl hrang hrang 200 chuangin an thlai thar atana Minimum Support Price (MSP) fixed a awm theih nana dan siam leh, loneitute tana pension buatsaih leh thil dang an phutte tihlawhtling tura sorkar laipui kar nana Delhi pana kawng an zawh chuan boruak nei lian zelin, nimin khan sorkar laipui chuan inbiakna neihpui leh an duh thu an sawi.

Sorkar laipui chuan loneitute nena inbiakna neih leh an duh thu hi sawi mah se, loneitute thil phut ber, MSP fixed tura dan siam chu a theih loh thu an sawi thung. Union Agriculture Minister Arjun Munda leh Information and Broadcasting Minister Anurag Thakur-te chuan loneitute nena inbiakna an lo neih tawhah inremna nei thei lo mah se, inbiakna neih leh an duh thu hi an sawi a, loneitu lam pawh an sawm tawh niin an tarlang. "MSP fixed tura dan siam chungchangah hian sorkar laipui chuan kil hrang hrang aṭanga a thlir a ngai a, nawrh huaihawtte pawhin an dawhtheih deuh a ngai a ni. Thil hrang hrang ngaihtuah thar zel chung chuan thutlukna siam vat a har ṭhin" tiin an sawi.

Nawrh huaihawt zinga SKM-NP hruaitu, KV. Biju chuan,"Sawihona neih hi kan duh lo a ni lo, thutlukna kan nghak ang a, kan duh ang a nih loh chuan loneitute hian kawngpui danna hi nawr chhiain Delhi kan pan tawh ang," tiin a sawi ve bawk.

Delhi pana loneitute kawng zawh avang hian state dang aṭanga Delhi luhna kawngpui hrang hrang chu dan vek a ni a, Uttar Pradesh aṭanga Delhi luhna kawngpui pawh venhimna khauh tak hnuaiah dan chhunzawm a la ni. Haryana aṭanga Delhi pan tum, Punjab lama kalte chu venhim hna thawktute nen innawr buaiin, Haryana leh Punjab inrinaah hian buaina nasa tak a chhuak. Police-te hian loneitu pung khawmte hi water canon leh drone aṭanga tear gas thlakin hnawh darh an tum a, an innawr buainaah hian loneitu mi 60-in hliam an tuar nia hriat a ni. Loneitute hi tractor trolley-te nen thawk chhuakin, police-in kawngpui an danna hi nawr chhiat an tum a, police-te hi lunga vawmin, police 24-in hliam an tuar ve bawk a ni.