Eptu party-te'n sorkar chet dan dem

Eptu party hrang hrangte chuan loneitute laka Narendra Modi kaihhruai sorkar chet dan chu an dem thu sawiin, tear gas hman a ni te, Delhi luhna kawngpui dante chuan sorkar laipui chu loneitute nena indo ang maia a khawsak thu an sawi.

Delhi-a press mite a kawmnaah, Congress general secretary Randeep Singh Surjewala chuan loneitute'n ralmuang taka nawrh huaihawt mai an tum laiin sorkar laipui chuan loneitute dan nan rip taka a chet chhuah thu leh, ram dang nena indo anga maia an chet thu a sawi. West Bengal chief minister, Mamata Banerjee pawhin BJP sorkar chu loneitute tihduhdahna niin a sawi bawk a, CPI general secretary, D. Raja chuan Modi sorkar chu MS Swaminathan hnena Bharat Ratna pek tur avanga a inchhuan em em laiin, MSP chungchanga loneitute duh anga MS Swaminathan-a rawtnate erawh hman a hreh leh hle si niin a sawi ve bawk. All India Forward Bloc general secretary G. Devarajan chuan an party chu loneitute lama an din thu leh, 2022-a an nawrh an tihtawp ṭuma sorkar laipuiin a thil tiamte chu sorkar pawhin an hriat reng a ṭul thu a tarlang.