Loneitute kawng zawh (Dilli Chalo) : Haryana-ah internet tihtawp hun pawtsei ; Ram pum huap bandh huaihawt

India rama loneitu pawl hrang hrangin nawrh huaihawta Delhi pana kawng an zawh chu Delhi ramriah dan an ni a, hmun ṭhenkhatah chuan buaina chhuak avangin hliam tuarte pawh an awm. Loneitute nawrhna avang hian Haryana sorkar chuan Haryana-a internet tihtawp hun chhung chu pawhsei a nih thu puangin, internet tihtawp hian Ambala, Kurukshetra, Kaithal, Jind, Hisar, Fatehabad leh Sirsa district-te a huam. Haryana-ah hian loneitute nawrhna avangin tun thla chhungin internet tihtawp a nih ṭum thumna a ni.

Hetih lai hian loneitute hian nimin khan ram pum huapa bandh huaihawt a nih thu an puang. Ram pum huap bandh huaihawt an puan avang hian Delhi police-te chu nasa zawka inbuatsaihin, venhimna pawh khauh zawka kalpui tum a ni. Loneitute hian bandh huaihawt chu an thil phut tihhlawhtlin nana BJP kaihhruai sorkar laipui nawrna atan an ti a ni. Bandh huaihawt a nih chhan hi Delhi leh Haryana inrina; Simghu leh Tikri-a Delhi pan tur loneitute dan chhunzawm zel an nih vang a ni a, helai hmunah hian venhim hna thawktu mi 5,000 chuang dah an ni. Delhi police-te hian loneitute dan nan hian tear gas te an hmang a, tear gas shell 30,000 an chah belh mek bawk nia hriat a ni. Helai hmunah hian thla khat chhung atan CrPC, section 144 puan a ni bawk.

Loneitute thil phut zingah hian an thlai tharte sorkarin a leisakna tur, Minimum Support Price (MSP) chungchanga a man fix a nih theih nana dan siam an phutna chu a langsar berte zinga mi a ni. Sorkar laipui chuan loneitute nena inbiakna neih leh hi duh mah se, anni lam hian an thil phut tihhlawhtlinna tur a nih loh chuan inbiakna neih an duh loh thu an sawi thung. Loneitute hian Thawhlehni khan Delhi pana kawng zawh hi an ṭan a, kawng zawh ṭan a nih hma hian sorkar laipui nen vawi hnih indawr tawhin inremna an la nei thei lo. Ningani tlai khan a vawi thum nan an indawr leh a, loneitute chuan an thil phut chungchangah sorkar laipuiin beiseina a pek avangin February 18 hian inbiakna mumal zawk an neihpui leh dawn niin an sawi.

Sorkar laipui nena inbiakna nei ṭha leh tura sawi a nih hnuah Punjab Kisan Mazdoor Sangharsh Committee general secretary, Sarwan Singh Pandher chuan Prime Minister Narendra Modi chu an buaina chungchanga inrawlh tura a duh thu a sawi a, ralmuang tak leh muanawm taka an harsatna neihte sutkian an duh thu a sawi. Nimin khan loneitute hian press conference neiin, sorkar laipuiin anmahni dan nana sipai a hmang chu an hriatthiam loh thu an sawi a, mi tam takin hliam an tawrh phah niin an tarlang.

Nawrh huaihawt zinga loneitu pakhat thi

Loneitu nawrh huaihawt zinga tel, Gian Singh chu heart attack avangin nimin khan a boral. Gian Singh hi Haryana-a Ambala bul, Shambhu nawrh huaihawtna hmuna a awm laiin, nimin zing khan a awmah na a neih avangin Punjab-a Rajpura civil hospital-ah hruai a ni a, damdawi in thlenpui a nih hnuah a thi a ni.

Gian Singh hi kum 63 mi a ni a, Punjab-a Gurdaspur district-a seilian niin, Haryana leh Punjab inrina, Shambhu-ah hian Delhi pana loneitute kawng zawhnaa telin trolley-ah midang pangate nen an mu a ni. Zing dar 3 velah a awm a nuam lo a, dar 5 velah damdawi in thlenpui niin, zing dar 7:45 khan a thi niin a tupa, Jagdish singh chuan a sawi. Gian hi Kisan Mazdoor Morcha (KMM) hnuaia Kisan Mazdoor Sangharsh Committee (KMSC) member a ni.