BJP-in an party aṭanga Rajya Sabha seat chuh tur puang

Bharatiya Janata Party (BJP) chuan an party aṭanga Uttar Pradesh-a Rajya Sabha seat chuh tur pariatna an puang. Uttar Pradesh-ah hian Rajya Sabha seat 10 atan inthlanna neih tur a ni a, tunah hian seat chuh tum mi 11-in nomination an theh lut tawh. Nomination theh luhte endik hun atan hian February 16 ruat a ni a, inthlanna hi February 27-ah neih tur a ni thung.

BJP aṭanga Rajya Sabh seat chuh tur hi Sanjay Seth niin, Samajwadi Party (SP) hruaitu hlui a ni a, Ningani khan nomination theh lutin, state deputy chief minister, Keshav Prasad Maurya leh state BJP president, Bhupendra Chaudhary te chuan an ṭawiawm a ni. Uttar Pradesh-ah hian BJP-in sorkarna an siam mek a, Rajya Sabha seat 10 atan hian seat chuh tur mi pasarih an tichiang tawh a, heng zingah hian Sudhanshu Trivedi te, RPN Singh, Navin Jain, Sangeeta Balwant, Sadhna Singh, Anarpal Maurya leh Chaudhary Tejveer Singh te an tel. MLA seat 403 awmna, Uttar Pradesh-ah hian BJP hian MLA 252 an nei mek a, an thawhpui party dang zawngte hian belh khawmin MLA 37 an nei ve bawk. BJP candidate pariatte hian tling vek turin vote 296 an hmuh a ngai a ni.

Uttar Pradesh-a BJP elpui ber, SP hian MLA 108 an nei thung a, an thawhpui Congress-in MLA pahnih an nei ve bawk. SP hian Rajya Sabha seat pathum chang turin vote 111 an mamawh ve thung a ni. Rajya Sabha MP atana tling tur hian candidate tin hian MLA vote 37 tal an hmuh a ngai.

JP Nadda-a'n Gujarat aṭangin RS seat chuh dawn

BJP national president, JP Nadda chuan Gujarat aṭanga Rajya Sabha seat a chuh tur thu puangin, Ningani khan Ghandinaghar-a state assembly complex-ah nomination a theh lut.

Gujarat-ah hian Rajya Sabha seat pali ruak tur a awm a, hemi atan hian BJP chuan candidate pali siam tawhin, JP Nadda bakah hian Govind Dholakia leh Other Backward Classes (OBC) hruaitu pahnih; Mayank Nayak leh Dr. Jashwantsinh Parmar te an tel a ni. Gujarat hi BJP rorelna a ni a, state assembly-ah Congress chuan member an neih tlem avangin Rajya Sabha seat hi chuh an tum lo nia hriat a ni a, hei vang hian Gujarat aṭanga BJP candidate-te hi tling vek tura ngaih an ni.