Sorkar laipuiin Punjab-ah internet tihtawp hun pawtsei

Sorkar laipui chuan loneitute'n Delhi pana kawng zawh an neih mek laiin, Punjab-a police station 20 huam chhunga internet a tihtawp mek chu February 24 thleng pawhsei a nih thu a sawi.

Loneitute'n lungawi lohna an lantir aṭangin vawiin hi a kar khatna chiah a ni a, nimin thleng kha chuan loneitute hi Delhi chhehvel state ramriah sipaite'n dangin, Delhi hi an la lut thei lo a ni.

Union ministry of home affairs (MHA) chuan February 10 leh 12 te khan Indian Telegraph Act, 1885 hmangin Punjab-a district pasarihah internet tihtawp hi an kalpui a, Inrinni khan February 24, zanlai dar 12 thleng internet tihtawp chhunzawm tur a nih thu hi an thuchhuahah an tarlang.

MHA hian internet tihtawp pawhsei a nih chhan chu mipui himna atan leh rikrum thil a thlen loh nan a nih thu an sawi a, Indian Telegraph Act hnuaia Temporary Suspension of Telecom Services (Public Emergency or Public Safety) Rules 2017 ṭan chhanin internet hi tihtawp a ni. Punjab ang tho hian Haryana-ah pawh internet tihtawp hi state sorkarin a kalpui mek a, hei hi Delhi pana loneitute kawng zawh vanga hmang an ni. Haryana sorkar hian an state chhunga Punjab ramri district-ah te internet hi a titawp a, hei hi February 19 thleng pawhsei a lo ni ve tawh bawk a ni.

Loneitute leh sorkar laipuiin inbiakna neih ṭhat tum

Loneitu kawng zawh zinga Punjab leh Haryana ramri, Shambhu-a inkhuar mek, Punjab Kisan Mazdoor Sangharsh Committee hruaitute chuan sorkar laipuiin inbiakna neihpui a duh thu sawiin, union minister-te nena sawihona hun pe tura an ngen thu an sawi. Loneitu pawl hruaitute hian sorkar laipui chu thil dang ti kual lo a, an thil phuttte pawm mai tura an duh thu an sawi thung.

Loneitute hian an thlai tharte tana Minimum Support Price (MSP) fix tura dan siam an phut chungchangah, sorkar laipui chuan buaina chinfel a duh tak tak chuan he dan hmanna tur (ordinance) thu chhuah turin an phut. Kisan Mazdoor Morcha (KMM) hruaitu, Sarwan Singh Pandher chuan,"Modi sorkar hian buaina chinfel dan kawng an zawng tak zet a nih chuan MSP fix-na tur dan hi ordinance siam se, chumi zawhah inbiakna chu kan nei leh thei chauh ang," tiin a sawi.

Nawrh huaihawt mek, loneitute leh sorkar laipui hian ṭum thum inbiakna an nei tawh a, inbiaknaah hian sorkar laipui aiawhin Union Agriculture and Farmer Welfare Minister Arjun Munda, Commerce and Industry Minister Piyush Goyal and Minister of State for Home Affairs Nityanand Rai te an tel. Hetih lai hian nimin tlai dar 6 khan union minister-te nen Chandigarh-ah inbiakna nei lehin, he thu buatsaih lai thleng hi chuan eng ang inremna nge an neih hriat a ni lo.