Punjab-ah Congress leh AAP-in a malin LS seat chuh dawn

Delhi chief minister leh Aam Admi Party (AAP) hruaitu, Arvind Kejriwal chuan Punjab-a Lok Sabha seat chuh dan tur chungchangah Congress nen inremna an neih tawh thu sawiin, party pahnihte hian a mala seat an chuh tur thu a sawi.

Kejriwal hian nimin khan Congress hruaitu leh dan hremi hmingthang tak, Abhishek Singhvi chu a inah a tlawh a, hemi hnu hian chanchinbu mite hmaah thu sawiin, Congress leh AAP chuan Punjab-a Lok Sabha seat chuh dan tur chungchangah inremna neiin, party mala seat chuh tura an inrem thu leh, harsatna an neih loh thu a sawi. Kejriwal chuan Delhi-ah pawh Congress leh AAP chuan Lok Sabha seat insem dan turah ruahmanna an neih tawh thu sawiin, Congress nen hian an ṭangho a nih loh chuan BJP chu an hneh theih loh tur thu a sawi. Delhi-ah hian Lok Sabha seat pasarih a awm a, inthlan hnuhnung berah khan BJP chuan hnehna an chang vek a ni.

Congress leh AAP te hi INDIA-ah thawkho ni mah se Punjab-a rorel lai, AAP chief minister, Bhagwant Mann chuan Punjab-ah AAP chuan party mala Lok Sabha seat an chuh tur thu hi a lo sawi tawh a, hei vang hian Congress leh AAP te chuan seat insem dan tur chungchanga rei tak inbiakna neiin, inremna hi an siam thei ta a ni.