BJP-in national convention nei

Bharatiya Janata Party (BJP) chuan nimin khan Delhi-ah national convention neiin, Lok Sabha inthlan atana an inpeih tawh thu an sawi. Convention-ah hian Ayodhya-a Ram temple din chu kum 1,000 chhung atana India rama Ram-a lal ram dinna a ni tih resolution an pass bawk.

BJP national convention-ah hian Prime Minister Narendra Modi chuan thu sawiin, BJP hruaitu leh thawktute chu ni 100 chhunga voter-te rinna hlawh chhuak tura tha thawh ṭheuh turin a sawm a,"Kan hma maia Lok Sabha inthlan lo awm turah hian vote nei thar zawng zawngte, hamṭhatna dawng zawng zawngte, hnam zawng zawngte, mi zawng zawng rinna hlawh chhuak tura hma kan lak a ngai a ni," tiin a sawi. PM chuan NDA-in Lok Sabha seat 400 lak a tum a nih chuan BJP chuan seat 370 an lak a ṭul tur thu a sawi bawk. "A ṭum thumna atana thlan tlin ka nih duh chhan chu thuneihna neih duh vang ni loin, ram tana hnathawh chhunzawm zel ka duh vang a ni. Ka in chauh ka ngaihtuah chuan mi nuai tel tan in ka sa thei lo ang" a ti.

BJP hian Lok Sabha inthlan atana inbuatsaihna ngawrh takin an kalpui ṭan tawh a, thla hmasa aṭang khan national general secretary-te chu ruahmanna siam leh candidate siam rem chungchang sawiin kar tin an inhmu khawm tawh a ni. BJP hian vote nei thar te bakah, sorkar laipui scheme kaltlanga hamṭhatna dawng te, hnam hnuaihnung zawk aṭanga voter te leh hmeichhia te vote chu a tam thei ang ber lak an tum thu an sawi.