Dilli Chalo : Loneitute kawng zawh chawl lailawk

Delhi pana loneitu lungawi lote kawng zawh, Dili Chalo chu Pathianni tlaia union minister-te nen inbiakna an neih hnuah chawlh lailawk a ni. Pathianni tlaia inbiakna an neihah hian sorkar laipui chuan loneitute chu thlai panga atan Minimum Support Price (MSP) pek a tiam niin an tarlang.

Loneitute leh sorkar laipui aiawh, union minister-te hian Pathianni zan khan a vawi li nan inbiakna an nei a, union commerce minister, Piyush Goyal chuan inbiakna an neih chungchangah harsatna chingfel tura beiseina a awm thu a sawi. "Loneitute thil phut hrang hrang kan sawiho a, kal zel dan turah pawh ruahmanna kan siampui a ni. Thil pathum vel inrem theih lohna a la awm tih lohah chuan harsatna kan nei tawh lo niin a lang a, kan ruahmanna siamte hian Haryana leh Punjab bakah, ram puma loneitute a puih theih ngei kan beisei," tiin a sawi. Sorkarin loneitute tana rawtna a siamah hian sorkar hnuaia agency ṭhenkhat; NCCF leh NAFED te chuan contract hmangin, loneitute hnen aṭang hian pulses - arhar, tur leh urad bakah vaimim te chu MSP angin an laksak ṭhin dawn a ni. Cotton corporation of India chuan MSP-a cotton lei turin kum nga chhung inremsiamna a nei bawk ang tiin, union minister hian loneitute chuan an kawng zawh chu titawp tawh se a duh thu a tarlang.

Kawng zawhnaa tel, Kisan Mazdoor Morcha (KMM) hruaitu, Sarwan Singh Pandher chuan,"Sorkarin thlai panga atana MSP pek min tiamna hi loneitute bakah, agriculture leh dan lama mi thiamte rawn chungin kan ngaihtuah phawt ang. Tunah chuan sawihona neih phawt kan duh a, hei vang hian Delhi pana kan kawng zawh pawh hi kan titawp lailawk dawn a ni. February 21-ah hian kan kawng zawh hi muanawm taka chhunzawm kan tum dawn a, chumi hmain kan thil phut dangte sorkar hnenah kan thlen leh phawt dawn a ni," tiin a sawi.

Punjab-a loneitu, Delhi pana kawng zawhte hi dan an nih avangin February 13 aṭang khan Haryana nena an inrina hmun hnih; Shambhu-Ambala inkarah leh Khanauri-Jind inkarah te awmhmun an khuar mek a, helai hmunah hian Haryana-a loneitute pawhin an zawm ve a ni.

SKM-in NDA MP-te in kawta lungawi lohna lantir tum

Nawrh huaihawt mek, loneitu pawl zinga mi, Samyukt Kisan Morcha (Non-Political) (SKM) chuan February 21 hian, loneitute tana an thil phut chungchanga sorkar kar nan, BJP kaihhruai sorkar laipuia NDA thawhpui MP zawng zawngte in kawtah lungawi lohna lantir an tum thu an sawi.

SKM hian chhun zan zawma NDA MP-te in kawta lungawi lohna lantira pun khawm hi an tum thu an sawi a, Supreme Court-in electoral bond dan kalh a nih thu a puan chungchangah Narendra Modi kaihhruai sorkar chu eirukna hmanga party hamṭhatna tur zawngah an puh bawk. SKM chuan sumdawngte ṭhatna atana farm law siam te, labour code bakah electricity act amendment te, PM Fasal Bima Yojana leh thil dang dang pawh, BJP-in anmahni hamṭhat nana ti vek an nih thu an sawi. "Sorkar laipui hian thlai 23 atan chauh MSP a pe a, chu pawh a rate dik taka lak a nihna tur a tiam lo bawk. Paddy atana MSP chu quintal khatah Rs. 2,183 a ni a, Bihar leh Uttar Pradesh chhak lamah te chuan sumdawng leh mi dang dangin quintal khatah Rs. 1,200 aṭanga 1,400 te'n an laksak thung," tiin, thil kal mek dan chu loneitute phurrit belh chhahtu chauh a ni an ti.

Delhi pana loneitu pawl hrang hrangte kawng zawh hi Kisan Mazdoor Morcha leh Sanyukt Kisan Morcha (Non-Political) te buatsaih a ni a, anni hnuaiah hian loneitu pawl 200 chuang an awm a ni. SKM leh Punjab-a loneitu pawl lian ber zinga mi, Bharatiya Kisan Union (Ugrahan) te chuan February 20 aṭang 22 thleng BJP MP, Minister leh MLA te in kawta lungawi lohna lantira pun khawm an tum thu hi an sawi a, tin, Haryana-a Bharatiya Kisan Union (Charuni) pawhin an kal zel dan turah an pawl hotute leh sorkar laipui indawr dan an ngaihchan thu an tarlang.