UP-ah SP-in Congress tan LS seat 11 an kian thei

Uttar Pradesh-a Congress-in INDIA-a an thawhpui, Samajwadi Party (SP) chuan Lok Sabha seat chuh tur insem dan turah inremna an la nei thei lo a, hetih lai hian SP chuan Congress tan Lok Sabha seat 11 an ken theih tur thu an puang.

UP-ah hian INDIA angin Lok Sabha-ah seat an chuh dawn em tih hi Congress leh SP hian an la sawi chiang lo a, SP hian Congress tana seat 11 an ken tur hi an pawm lo a nih chuan 2024 Lok Sabha inthlan atana thawhhona a awm theih beisei a ni lo a ni. Mahse Congress hian Uttar Pradesh-ah hian seat 11 aia tam chuh an inbeisei thung. Uttar Pradesh-ah hian Lok Sabha seat 80 a awm a, 2019 inthlanah khan Congress hian seat khat; Raebareli-ah chauh hnehna an chang a ni.

Samajwadi Party hotu Akhilesh Yadav chuan,"Vawi eng emaw zat seat insem chungchang hi kan sawiho tawh a, rawtna tam tak pawh siam a ni. Inremna neih a nih hunah SP pawh hian Bharat Jodo Nyay Yatra hi kan zawm ve ang.," tiin, Congress-in yatra zawm tura an sawmna chungchang a sawi.