Dilli Chalo : Loneitute'n sorkar laipui rawtna hnawl, kawngzawh an chhunzawm dawn

Loneitu nuar mekte hnena sorkar laipuiin thlai panga atana Minimum Support Price (MSP) pek a rawtna chu loneitu pawlte'n an sawiho hnuah an pawm loh thu an puang. Loneitute hian Delhi pana kawng an zawh (Dilli Chalo) chu February 21 aṭanga an chhunzawm tur thu an puang zui.

Loneitu pawl 200 chuang kaihruaia Delhi pana kawng zawh buatsaihtu, Kisan Mazdoor Morcha leh Sanyukt Kisan Morcha (Non-Political) te chuan February 21 aṭanga an kawng zawh an chhunzawm tur thu hi tarlangin, an thil phutte tihhlawhtlin a nih ngei theih nan sorkar kar zel an tum thu an sawi. Kisan Mazdoor Morcha hruaitu, Sarwan Singh Pandher chuan,"Union Minister Piyush Goyal-a'n chanchinbumite hmaa kan tana rawtna a neih a sawi leh, inbiakna kan neih laia rawtna an siamte kha a inang lo. Inbiakna kan neihah chuan union minister hian MSP anga thlai panga lei chu contract anga kalpui a nih tur thu a sawi a, hei hian an thil tum a tichiangin kan hria a, an rawtna hi kan hnawl nghal a ni," a ti. Pandher chuan,"February 21 hian kan lungawi lohna lantirin kawng kan zawh chhunzawm dawn a, sorkar laipui hnena kan ngen duh chu kan thil phutte tihhlawhtling turin inbiakna min neihpui a nih loh chuan Delhi kan panna tur kawng an dan hi la sawn rawh se tih hi a ni," tiin a sawi.

Pathianni tlai khan loneitute leh sorkar laipui aiawh, union minister-te chuan Chandigarh-ah a ṭum lina atan inbiakna an nei a, hemi ṭum hian union commerce minister, Piyush Goyal chuan inbiakna hlawhtling leh beiseiawm tak an neih thu sawiin, loneitute tana rawtna an neihte a tarlang bawk. Sorkar lam rawtna hi Thawhṭanni tlai khan loneitu pawl hrang hrangte chuan sawihoin an hnawlsak a ni. Samyukt Kisan Morcha (SKM) hruaitute chuan inbiakna an neih chungchangah sorkarin langtlang taka thil a kalpui loh thu leh, thlai panga atana MSP pek an rawtna chu contract anga kalpui an tum leh si thu te, mipui rilru lak pen nan mai mai thil an kalpui chu an lungawi loh thu an sawi ve bawk.

Delhi pana kawngzawh, loneitu eng emaw zat chu Punjab leh Haryana inrinaah hian awmhmun khuarin an la awm chhunzawm reng a, vawiin hi kawng zawh ṭan a nih aṭanga a ni kuana a ni tawh. Punjab leh Haryana inkarah hian sorkar chuan kawng dangin sipai a dah bawk a, hei vang hian Delhi an la thleng thei lo a ni.