PM Modi-a'n AIIMS paruk hawng dawn

Prime Minister Narendra Modi chuan tun ni ruk lo awm tur chhung hian AIIMS paruk a hawng dawn niin sorkar official-te chuan an sawi.

PM Modi hian nimin khan Jammu & Kashmir, Samba district-a AIIMS din tur hi hawngin, AIIMS dang panga, Rajkot, Mangalagiri, Bathinda, Rae Bareli leh Kalyani-a sak turte chu February 25-a Gujarat-a hun a hmannaah a hawng thung dawn a ni. PM hian ram chhung hmun hrang hranga medical college leh nursing college sak tharte a hawng nghal dawn a, PM-Ayushman Bharat Health Infrastructure Mission hnuaiah, medical college thar leh inenkawlna hmun sak thar tur eng emaw zat lung phum a phum bawk ang.

Jammu & Kashmir, Samba district-a AIIMS din tur hi February 2019 khan PM Modi hian a lung a lo phum tawh a, hei hi Pradhan Mantri Swasthya Suraksha Yojana hnuaia sak a ni. A sak nan hian Rs. vbc. 1,660 sen a ni a, acre 227 a zau niin, khum 720 a awm bakah, seat 125 awmna medical college a ni nghal. Nursing college seat 60 ni bawkin, AYUSH block, khum 30 awmna a keng tel a ni. Heng bakah hian thawktute tana riahna hmun sak tel a nih bakah undergraduate leh postgraduate te tan hostel siam tel a ni bawk.