Zirlaite'n pawl 10 leh pawl 12 board exam nawn thei dawn

Union education minister, Dharmendra Pradhan chuan 2025-2026 academic session aṭang chuan zirlaite'n an duh chuan kum khatah pawl 10 leh pawl 12 board exam an neih nawn theih tawh tur thu a sawi.

Union minister hian he thu hi Chhattisgarh khawpui, Raipur-a Pandit Deendayal Upadhyay auditorium-a sikul 211 upgrade-na tur scheme; PM SHRI (Prime Minister Schools for Rising India) tlangzarhnaah a sawi."National Education Policy (NEP) thil tum ber pakhat chu zirlaite tana an zirlai avanga rilru hah lutuk chhawk zangkhai theih dan kawng a ni. Hemi hlawhtlin nan hian 2025-2026 academic session aṭang chuan zirlaite hian an duh chuan kum khatah pawl 10 leh pawl 12 board exam an hmachhawn nawn thei ang," a ti. Ministry of Education chuan nikum August thla khan New Curriculum Framework (NCF) an tihchhuahah, board exam chu kum khatah vawi hnih buatsaih ṭhin a nih tawh tur thu leh, vawi hnih exam aṭanga mark an hmuh ṭhatna zawk an ken tlang theih tur thu an lo tarlang tawh a ni.

Chhattisgarh-a tlangzarh, PM SHRI scheme phase khatnaah hian elementary level school 193 bakah, secondary school 18, a vaiin sikul 211 te chu upgrade hmasak tum a ni a, hei hi 'hub and spoke' model vuahin, sikul tin tan hian Rs. vbc 2 ruahman a nih thu union minister hian a tarlang bawk.