Dilli Chalo: Dan bawhchhiate hrem turin Punjab sorkar hriattir

Loneitute leh sorkar laipui aiawhte inbia chuan inremna an siam theih loh avangin nimin aṭang khan loneitute chuan Delhi pana kawng zawh an chhunzawm leh a, buaina nasa zawk a chhuah zel loh nan, Ministry of Home Affairs (MHA) chuan Punjab sorkar chu kawng zawh zinga dan bawhchhiate hrem zel turin a hriattir.

Sorkar laipui chuan Punjab leh Haryana inrinaah loneitu 14,000 chuang an pung khawm niin an tarlang a, hei bakah kawng zawhnaah hian tractor-trolley 1,200, bus tê 10 leh lirthei tê deuh eng emaw zat a awm bawk niin an tarlang. Home ministry chuan loneitute zinga mi anga khawsain, misual tute emaw, lung vawm leh kawng danna tihchhiat tum an awm ṭhin niin an sawi bawk.

Delhi pana kawng zawh, loneitu tam ber hi Punjab leh Haryana inrina, Shambhu leh Khanauri-ahte awmhmun khuarin an khawsa mek a, Delhi an luh loh nan heng hmunahte hian kawngpui dan a ni. Punjab-ah vek hian Dhabi-Gujran-ah mi 4,500 vel chuan awmhmun khuar bawkin, tractor-trolley 500 vel a awm bawk. Delhi an panna tur kawng dan a nih avang hian kar hmasa khan buaina chhuakte pawh a awm a, an kawng zawh an chawlh lailawk chu nimin aṭanga chhunzawm leh a nih tak avangin sorkar laipui pawhin venhimna nasa zawk dah a tum thu leh, dan bawhchhiate laka action lak zel a nih theih nan Punjab sorkar a hriattir bawk a ni.

Hetih lai hian Haryana police pawhin Punjab police-te chu loneitute'n an kawng danna siam tichhe thei tur, bulldozer leh JCB-te chu mansak turin an hrilh. Haryana Director General of Police, Shatrujeet Kapoor chuan loneitute'n bulldozer leh JCB ang chite chu venhimna an dah tihchhiat nana an hman a hlauhawm thu a sawi a, heng lirthei liante hi Khanauri leh Shambhu an thlen phalsak chi a nih loh thu Punjab Director General of Police, Gaurav Yadav a hriattir a ni.

BJP-in inremna nei thuai turin loneitute ngen

Bharatiya Janata Party (BJP) headquarters-a press conference neihnaah party hruaitu hlun, Ravi Shankar Prasad chuan Narendra Modi kaihhruai sorkarin loneitute tana hna tam tak a thawh hre rengin, loneitute chu buaina nasa zawk pumpelh a, inremna muanawm tak nei thei thuai turin a ngen. Prasad chuan nimin khan union minister Arjun Munda-a'n inbiakna neih a duh tih sawiin, inremna chu sawihona aṭang chauha awm thei tur leh hemi atan hian sorkar pawh a inhawn thu a tarlang.

Hetih lai hian Punjab Kisan Mazdoor General Secretary, Sarwan Singh Pandher chuan sorkarin contract anga kum nga chhung thlai panga tana MSP pek a rawtna chu loneitute tana phurrit belhtu tur mai leh, a tir aṭanga an phut, MSP atana dan siam chu pek ngei an nih theih nan buaina siam loa, an kawng zawh chhunzawm an duh thu a sawi. Pandher hian ṭhalai, loneitute leh lo lama hnathawk vete pawh tu mah kal chhunzawm an phal dawn lo tih sawiin, pawl hruaitute chauh chuan Delhi pana kawng zawh an chhunzawm tur thu hi a sawi bawk. "Tu mah kan bei dawn lo a, hmanrua keng loin, kut ruakin kawng kan zawh dawn. Sorkar hi thutlukna siam turin kan duh a, MSP atana dan siam hi min tiam se heng zawng zawng hi a tawp vek tawh ang, "tiin a sawi.

Punjab-a loneitu pawl lian pakhat Bharatiya Kisan Union (Ugrahan) chuan Delhi-a loneitu pawl hrang hrangte kawng zawh an zawm ve tur thu sawiin, sorkar laipui chu loneitute thil phut chungchang sawiho tura parliament special session ko turin an ngiat. BKU (Ugrahan) president, Joginder Singh chuan sorkar chu loneitute dan nana tharum hmang lo tura a duh thu a sawi bawk.