March 1 thleng Bharat Jodo Nyay Yatra chawl dawn

Congress party chuan Rahul Gandhi kaihhruaia neih mek, Bharat Jodo Nyay Yatra chu February 26 aṭanga March 1 thleng chawlh a nih tur thu sawiin, February 22 leh 23 pawh chawlh hahdam nana hman a nih tur thu an sawi.

Congress general secretary (Communications), Jairam Ramesh chuan yatra chawlh lailawk a nih chhan tur hi sawiin, Rahul Gandhi chuan lehkha a zir chhuahna, Cambridge University-ah thu vawi hnih a sawi dawn a, Delhi-ah meeting pawimawh tak a nei dawn bawk tih a sawi. Ramesh chuan Uttar Pradesh, Kanpur-a hun hman a nih zawhah February 22 leh 23 te chawlin, February 24-ah Uttar Pradesh-a Moradabad-ah yatra hi chhunzawm leh a ni ang a, Sambhal, Aligarh, Hathras leh Agra-ah te kal zuiin, Rajasthan khawpui, Dholpur an lut leh dawn niin a tarlang.

Yatra hi March 2-ah Dholpur aṭangin chhunzawm leh a ni ang a, heta ṭang hian Morena, Gwalior, Shivpuri, Guna, Shajapur leh Ujjain-ah te kal chhunzawm lehin Ujjain-ah hian March 5-ah Rahul Gandhi chuan Mahakaleshwar temple-ah darshan a nei dawn a ni. Bharat Jodo Nyay Yatra hi January 14 khan Manipur aṭanga neih ṭan a ni a, March 20 hian Mumbai-ah tihtawp tum a ni. Yatra hian state 15 a paltlang dawn a, hei hi km 6,700 a tling.