Maharashtra Assembly-ah Maratha tana 10% reservation siamna tur pass

Maharashtra assembly chuan Thawhlehni khan special session koin, session-ah hian Maratha hnam tana zirna in leh sorkar hna laka 10% reservation siamna tur an pass.

Chief Minister Eknath Shinde kaihhruai, Maharashtra cabinet chuan Maratha hnamte tana reservation siamna tur bill hi pass tawhin, cabinet-in a pass hnu hian assembly special session-ah hian pharh leh a ni a, Thawhlehni khan Maratha quota bill hi lungrual taka pass a ni ta a ni.

Hetih lai hian activist, Manoj Jarange-Patil; Maratha quota siam chungchanga chaw ngheia sorkar lo nawr tawh ṭhintu chuan, Maratha quota siam thar dan chu a lungawi loh thu sawiin, Maratha hnamte phatsanna a ni, a ti. Manoj Jarange-Patil hian Maratha quota chu a hrana siam loa, Other Backward Classes (OBC) quota awm sa aṭanga siam rem a duh a, hei hian Supreme Court duh dan a zui zawk niin a sawi. Maratha quota bill pass tak hi Devendra Fadnavis kaihhruai sorkarin a pass tawh; Socially and Educationally Backward Classes Act, 2018 nen a inang a, hei hi 2021 khan Supreme Court chuan hman loh tur tiin a lo hnawlsak tawh.