Dilli Chalo : Punjab aṭangin Haryana-ah loneitute lut, loneitu pakhat thi

Delhi pana loneitute kawng zawh chuan chawlh lailawk an neih hnuah sorkar laipui nena inremna an la neih theih loh avangin Nilaini aṭang khan kawng zawh an ṭan leh a, Punjab aṭanga Haryana luh tuma an beihnaah buaina chhuakin, loneitu pakhat a thi.

Punjab sorkarin thuchhuah a siamah, loneitu thi hi Balloh khuaa mi, Shubhkaran Singh (21) niin, a lu-ah hliam na tak a tuar niin an tarlang a, Patiala-a Rajindra hospital-ah hruaiin thia puan a ni nghal a ni. A thih chhan hi chiang zawka chhui a ni dawn tih a sawi bawk.

Buaina chhuakah hian thi pakhat a awm bakah, Shambhu-ah mi pakua hliam tuar an awm. Khanauri bul, Dhabi gujran-ah hliam tuar mi 14 an awm bawk niin Punjab sorkar chuan a tarlang. Punjab leh Haryana inrinaah hian loneitute hi ni kua an awm tawh a, Punjab aṭanga Haryana luh tum loneitute dan nan hian Haryana police-te chuan drone hmanga thlak tear gas leh rubber silai mute an hmang a ni. Loneitu eng emaw zatin hliam an tawrh bakah hian police lam pawh hian hliam tuar an nei bawk nia tarlan a ni. Loneitute hi hmai kawr, buara huh leh tear gas laka himna tur thil chi hrang hrang nen an inbuatsaih bawk a ni.

KMM hruaitu, Sarwan Singh Pandher chuan loneitu pawl hrang hrang hruaitu chinin Dehi pana ralmuang taka kawng zawh chhunzawm an tum laiin police lam hian tear gas leh rubber silai mu hmanga an rawn beih thu a sawi a,"Kan thil tum tihlawhtling tur hian kan bei zel ang. Khanauri-a loneitu pakhat thihna hi kan hmu vek a, hei vang hian kawng zawh hi ni hnih kan chawl lailawk dawn a, sawihona kan neih leh hnuah hma kan la chhunzawm zel ang," a ti.

Loneitu Shubhkaran Singh thihna hi nawrh huaihawttu zinga mi, SKM bakah sumdawng pawl hrang hrang leh eptu party-te pawhin an dem thu an sawi. Sumdawng pawlte chuan February 23 hi Shubhkaran Singh thihna avangin black day anga an hman tur thu an puang. Bharatiya Kisan Union (Charuni) pawhin nimin khan loneitu pakhat thihna an dem tih entir nan darkar hnih chhung Haryana-a kawngpui hrang hrang an dang bawk.

Punjab sorkarin MHA hnenah ngenna siam

Ministry of Home Affairs (MHA)-in Punjab sorkar hnena state chhunga dan leh thupek kenkawh a nih dan leh loneitute nawrh dinhmun report pe tura a hriattir hnuah, Punjab sorkar chuan mi 160-in hliam an tawrh tawh thu an tarlang.

Punjab sorkar chuan tear gas leh rubber silai mu hman a nih bakah, tharum hmanga loneitute nawr let tumna chuan hliam tuar zat a titam niin an sawi a, hetiang boruak karah hian Punjab sorkar chuan dan leh thupek a la kengkawh ṭha niin Punjab chief secretary chuan a sawi. Hetih lai hian February 20-a Punjab and Haryana High Court thupek chu an la dawn loh thu leh, website-ah pawh dah a la ni lo niin a sawi thung. Court thupekah hian Punjab sorkar chu Shambhu leh Khanauri-ahte mipui pun khawm khap turin hriattir a ni.

Punjab sorkar hian MHA chu dan kengkawh loah Punjab sorkar puh lo turin a ngen a, loneitute chu Delhi pan tum, dan an nih avanga Punjab-a tang an nih thu a sawi. Punjab CM pawhin inbiakna neih kawngah theihtawp a chhuah thu te tarlang bawkin, sorkar laipui chu loneitute kawng zawh chungchanga hma a lak danah fimkhur tura ngenin, dan leh thupek lekkawh kawngah pawh zahngai taka hma an lak a ṭul thu a sawi.

X-in sorkar laipui ngenna a hnawl

Ministry of Home Affairs (MHA) ngenna anga Ministry of Electronics leh IT department te'n loneitute nawrh kaihhnawiha social media platform hrang hranga account 177 block tura thupek a chhuah chu Twitter tia hriat ṭhin, X chuan an zawm theih loh thu an sawi.

X hian nimin khan post siamin, India sorkar ngenna anga loneitute nawrh kaihhnawih account block leh post siam khapna chu an zawm theih loh thu leh, mimalin a ngaihdante sawi tura zalenna a neih chu dan an duh loh thu an tarlang. "India sorkar chuan account ṭhenkhat X-a block tur leh post ṭhenkhat khap turin thupek a chhuah a, hengte hi pawisa chawitir leh tan ina dah theihte an ni. Sorkar thu zawm hian heng account leh post-te hi India ram bikah chuan kan khap ang a, mahse, mimalin a ngaihdan sawi tura zalenna a neih zahsakna leh sorkar thupek hi ṭha kan ti lo tih entir nan a zawng zawnga khapna kan kalpui lo ang," tiin an tarlang.

Sorkar laipuiin thupek a chhuah hi danin a phal loh avanga an tlangzarh theih loh thu X chuan sawiin, sorkar laipuiin account block tura a duhte hnenah sorkar thupek chhuahna chu thawnin an hriattir thu an sawi bawk a ni.