UP-a Lok Sabha seat chuh turah Congress leh SP inrem

Hun rei tak inbiakna an neih hnuah, Lok Sabha inthlan lo awm tur atana Uttar Pradesh-a seat insem chungchangah INDIA-a thawkho; Congress leh Samajwadi Party (SP) te chuan thu tawp siamin, Uttar Pradesh aṭang hian Congress chuan seat 17 leh SP-in seat 62 chuh turin an inrem.

Uttar Pradesh-ah hian Lok Sabha seat 80 awmin, Congress leh SP hian seat chuh zat tur insem chungchangah inbiakna neiin inremna erawh hun rei tak an nei thei lo a ni. A tirah SP hian Congress tan seat 11 an ken theih thu sawiin, Congress hian an pawm loh chuan thawhhona tihtawp mai duhna pawh a lian hman hle. Hetih lai hian Congress hruaitu, Sonia Gandhi leh Congress general secretary, Priyanka Gandhi Vadra te chuan SP hruaitu, Akhilesh Yadav hi Nilaini khan inbiakna neihpui lehin, LS seat insem dan turah hian inremna an nei thei ta a ni.

Inremnaah hian SP chuan Uttar Pradesh aṭangin Lok Sabha seat 62 an chuh dawn a, Congress hian seat 17 chuh ve thungin, INDIA-a an thawhpui tho, Chandrashekhar Azad-a kaihhruai Azad Samaj Party chuan seat pakhat an chuh ve thung ang.