Dilli Chalo : Loneitute'n black friday hmang, tractor nen kawng an zawh

Punjab leh Haryana inrina, Khanauri-a loneitu pakhat thihna an tawrhpuina lantir nan, nimin khan loneitu nuar mekte chuan black friday an hmang. Samyukt Kisan Morcha (SKM) huaihawtin loneitute hian Delhi panna highway-ah tractor nen kawng an zawh bawk.

SKM huaihawta black friday hman a nih thu hi Bharatiya Kisan Union (BKU) hruaitu, Rakesh Tikait chuan sawiin,"Khanauri-a loneitu pakhat thihna kan tawrhpuina entir nan black friday hi kan hmang a ni. Ningani khan tractor nena kawng zawh hi kan lo nei tawh bawk a, nimin khan Delhi panna highway-ah tractor hmanga kawng zawh hi kan chhunzawm leh a ni," tiin, February 26-ah pawh tractor nena kawng zawh hi neih leh an tum thu a sawi. SKM hian nasa zawka nawrh huaihawt chu kalpui tum a nih thu Ningani khan an puang a, India ram pum huapa meeting neih tum a nih thu te, March 14-ah Delhi-a Ram Leela ground-ah tractor tel loa inhmuh khawm, ‘Kisan Mazdoor Mahapanchayat’ tum a nih thu leh, an thil tum chu sorkarin dan a tum loh thu te an sawi bawk a ni.

Loneitute hian Delhi pana an kawng zawh hi loneitu pakhat, Shubhkaran Singh thihna avangin ni hnih an chawl lailawk a, hemi chhung hian hmalak chhunzawm zel dan turte an sawi a ni. Loneitu pawl hruaitute chuan loneitu nawrh huaihawtte chunga sipai hmanga sorkar chet dan chu an dem thu an sawi a, mi tam takin hliam an tuar tawh niin an tarlang.

Haryana police-te'n loneitute lakah NSA hman tum

SKM-in nasa zawka India ram pum huapa nawrh huaihawt kalpui an tum thu an puan hnuah, Haryana-a Ambala district-a police- te chuan loneitute nawrhna avanga sorkar leh mimal bungrua chhia a awm a nih chuan, nawrhnaa telte bank account hrensakin, chuta ṭang chuan bungraw chhe man chu pek a nih tur thu an sawi. Haryana police hian loneitu pawl hrang hrang hruaitute lakah National Security Act (NSA) hman an tum thu an sawi bawk.

Haryana-a Ambala police-te sawi danin, kawng an danna te chu loneitute hian paltlang tumin tihchhiat leh dah sawn dan kawng an zawng reng niin an tarlang a, loneitute hian venhim hna thawktute hi lunga an vawm fo avang leh buaina an siam fo avangin sorkar bungrua leh mimal bungrua pawhin a tuar niin an tarlang bawk. Police-te chuan Prevention of Damage to Public Property Act 1984 (PDPP Act) hnuaiah, heng bungraw tihchhiatte man chawi tur hian nawrh huaihawtnaa telte bungrua leh account hrensak theih a nih thu te, Haryana Public Administration's Property Recovery Act 2021 hmangin bungraw tichhetu chu chawitir theih a nih bawk thu an sawi. Hei vang hian thuneitute chuan nawrh huaihawtnaa an hruaitute chu bungraw chhiat thu hlaah an chunga action lak a nih tur thu an hriattir a, dan anga hmalak an tum thu an hrilh a ni.

Congress-in loneitute thil phut ngaihtuah tura parliament special session neih rawt

Congress party chuan loneitute'n lungawi lohna lantira nawrh an huaihawt mek chungchangah, an thil phutte ngaihtuah a nih theih nan, parliament special session neih an rawt. Congress hian Punjab sorkar hnenah pawh assembly special session nei ve turin a ngen bawk.

Congress general secretary, Jairam Ramesh chuan loneitute chu ram hnuk an nih thu te, green revolution leh white revolution thlen chhan te, loneitute thawhrimna avanga India chu agriculture-a intodelh thei chauh a nih thu te X-ah post-in, loneitute'n MSP dan siam phuta an nawrh mek karah Narendra Modi sorkar chuan silai mute a pe zawk niin a sawi.