A vawi sarih nan ED-in Arvind Kejriwal ko

Enforcement Direc­torate (ED) chuan Delhi excise policy thubuai chungchangah Delhi chief minister leh Aam Admi Party (AAP) hruaitu, Arvind Kejriwal chu February 26-ah thubuai chhuitute hmaa inlan a, statement pe turin a ṭum sarih nan an ko.

ED hian Kejriwal hi an hmaa inlan turin vawi ruk an ko tawh a, Kejriwal hian ED kohna hi a zawm duh loh avangin ED hi special court-ah an lo zualko tawh a ni. Hemi chungchangah hian AAP chuan thuchhuah siamin,"Chandigarh-a mayor election neihnaa BJP-in hnehna an chan zawh loh avangin Kejriwal hi dan dik lo takin ED hian an ko a ni. Chandigarh-ah hian Supreme Court chuan democracy a chhan thei hlauh a, hemi rah chu BJP kaihhruai ED-in Kejriwal an koh hi a ni," tiin an tarlang.

AAP hruaitu, Atishi chuan press mite kawmin,"Kan hriat ṭheuh angin Delhi-a Lok Sabha seat insem chungchangah INDIA-a party-te chuan inremna an nei thei ṭep tawh a, heti lai karah hian AAP hruaitute chuan INDIA hi an chhuahsan lo a nih chuan Kejriwal man a nih tur thu vauna an dawng a ni. Inrinni emaw, Thawhṭanni hian Kejriwal hi CBI leh ED ṭang dunin ni rei lote chhungin an man dawn niin AAP hruaitute hian thu kan dawng bawk," tiin, BJP-in hmanraw chi hrang hrang hmanga AAP tihhlauh an tumna chu a hlawhtling dawn chuang lo niin a sawi.