Cabinet-in Navy tan BrahMos missile 200 chuang leina tur a pawm

Cabinet Committee on Security (CCS) chuan Indian Navy-te hman atan BrahMos supersonic cruise missile leh a ken tel thil dangte leina tur pawmin, Navy-te hman tur ralthuam lei nan hian Rs. vbc. 19,000 ruahman a ni.

CCS-in BrahMos missile leina tur a pawm takah hian missile theihna hrang hrang nei a huam a, km 290 chin kap thei leh a chi thar ber, km 450 thleng kap theite lei tel tur niin an tarlang. BrahMos missile lei turte hi indo lawng hrang hrangah dah tura ruahman a ni a, hei hian Indian Navy-te a thuam chak tura beisei a ni. Missile lei tura inremsiamna mumal tak hi thla rei lote chhunga peihfel hman beisei a ni.

BrahMos missile-te hi BrahMos Aerospace Pvt. Ltd. siam niin, hei hi India leh Russia-te thawh dunna a ni a, tui hnuai lawng, indo lawng, thlawhtheihna leh lei aṭanga kah chhuah theih supersonic cruise missile te an siam ṭhin a ni. BrahMos missile-te hi Mach 2.8-a chak tein an thlawk thei a, hei hi ri aia a let thuma chak a ni. Indian Air Force (IAF) chuan BrahMos supersonic cruise missile te hi Sukhoi fighter jet ṭhenkhat thuam nan an hmang tawh a ni.