Hri kai hmuh chhuah thar tam ber ni thleng leh
Tun hnaiah India ram hmun hrang hrangah hri kai hmuh chhuah thar tlemin a tlahniam a, hri kai hmuh chhuah thar aia darkar 24 chhunga dama puan an tam changte pawh awm ve bawk mah se nimina Ministry of Health and Family Welfare report aṭanga a lan dan chuan hri kai hmuh chhuah thar mi 69,652 an awm leh a, hei hi ni khata hri kai hmuh chhuah tam ber ni a ni leh a ni. India ramah hri kai mi 28,36,925 an awm tawh a, hri kai mek 6,86,395 an la awm bawk.
Nimina sorkar report tihchhuahah hian darkar 24 chhunga dama puan mi 58,794 an awm a, hei nen hian hri kai enkawl dam 20,96,664 an awm tawh a, thihpui 977 lai awm lehin, anni nen hian mi 53,866-in an thihpui tawh. Hri kai dam leh tawh rate hi 73.90% a ni a, thihpui rate hi 1.90% a ni bawk.
ICMR Report
Indian Council of Medical Research (ICMR) chuan darkar 24 chhungin Covid-19 sample 9,18,470 an endik tih tarlangin hri len ṭantirh aṭanga nimin thleng khan sample 3,26,61,252 an endik tawh a ni.
ICMR hian ramchhung hmun hrang hrangah sample endikna atana laboratory pawmpui 1,494 a nei tawh a, heng zinga 977 hi sorkar laboratory niin 517 chu private laboratory a ni bawk.
State pathumah case nuai 3 chuang awm tawh
India rama Covid-19 kai tamna ber State/ UT Maharashtra-ah chuan hri kai hmuh chhuah thar 13,165 awm lehin nimin thleng khan mi 6,28,642-in hri an kai tawh a, chung zinga 4,46,881 chu dam leh tawhin mi 21,033 an thi tawh thung.
Tamil Nadu-ah pawh hri kai 3,55,449 an awm tawh a, Andhra Pradesh-ah pawh 3,16,003 an awm tawh bawk. Mahse heng state-ahte hian enkawl dam tawh rate a sang hle a, enkawl dam nuai hnih chuang an awm ve ve tawh a ni. Heng state pathum bakah hian Karnataka, Uttar Pradesh, Delhi, West Bengal leh Bihar-ahte chuan case nuai chuang a awm tawh bawk.
Union minister Shekhawat-a'n hri kai
Union minister Gajendra Singh Shekhawat chuan nimin khan Covid-19 a kai tih hriat a ni a, damdawi-inah dah luh nghal a ni.
Kum 52 mi, minister hian a twitter-ah coronavirus a kai thu hi a sawi. Tun hnaia amah nena inhnaihna lo neite chu inkhung hrang a, an sample test tir turin a ngen nghal bawk. Hemi hma hian union minister pali - Amit Shah, Dharmendra Pradhan, Arjun Ram Meghwal leh Shripad Naik-te chuan hri an kai tih hmuh a lo ni tawh bawk. Amit Shah hi a result a negative hnuah a taksa a chauh avangin AIIMS ah admit nawn leh a ni.