Dilli Chalo : February 29 thleng kawng zawh chawl lailawk dawn

Sorkar laipui hnena an thil phut hrang hrangte nawrna atana India ram loneitu pawl hrang hrangte kawng zawh chu February 29 thleng an chawlh lailawk tur thu an puang. Kawng zawh hi chawl lailawk mah se, Punjab leh Haryana ramria an pun khawmnaah erawh an awm chhunzawm zel dawn niin an tarlang.

Kawng zawh huaihawttu; Samyukta Kisan Morcha (Non-Political) leh Kisan Mazdoor Morcha (KMM) hruaitute chuan kawng zawh an chawlh lailawk tur thu hi an sawi a, KMM hruaitu, Sarwan Singh Pandher chuan kawng zawh an chhunzawm zel dan tur chungchangah February 29-ah hian thutlukna an siamte an puan zar tur thu a sawi bawk. Pandher chuan kawng zawh an chawlh lailawk chhunga an tihtur hrang hrangte sawiin, nimin khan loneitute tan seminar buatsaih a ni tawh a, vawiinah hian World Trade Organization leh sorkar laipui lem siamte hal tum a ni. Kawng zawh chawlh a nih chhung hian SKM leh KMM hruaitute chuan meeting vawi hnih tal neih an tum bawk. Loneitute hian kar hmasa Nilaini khan loneitu pakhat, Shubhkaran Singh thihna avangin an kawng zawh hi ni hnih an lo chawl lailawk tawh a ni.

SKM leh KMM hruaitute hian Shubhkaran Singh thihna chungchangah a thihnaa mawhphurte laka FIR theh lut turin Punjab sorkar chu an nawr a, state sorkarin thubuai a ziah luh hma chu a ruang hi hal ral an tum loh thu an sawi. Loneitu hruaitute hian Punjab sorkar chu Shubhkaran Singh martar-a puang tura an duh thu an sawi bawk. Hetih lai hian Punjab sorkar hian Shubhkaran Singh tan hian zángnadawmna Rs. vbc. 1 pek a nih tur thu leh, a farnu tan sorkar hna pek a lo tiam tawh a ni. Loneitu hruaitute hian Shubhkaran Singh thihnaah hian Haryana police-te chuan mawh an phur niin an sawi.

Loneitute thil phut zingah hian an thlai thar sorkarin a leisakna, Minimum Support Price (MSP) atana dan siam bakah, loneitute tana pension pek te, Swaminathan commission rawtna hman te, electric bill tihsan loh leh 2021-a nawrh an huaihawt ṭuma sorkarin an laka FIR a theh luh zawng zawng hnuhdawh leh, Lakhimpur Kheri inthahnaa nunna chante tana rorelna dik an phutna te a tel. Hei bakah World Trade Organization inremnaa agriculture sector paih chu an phut bawk a ni.