Criminal law thar July 1 aṭangin hmang ṭan dawn

Parliament winter session 2023 neiha pass tak, criminal law bill pathumte chu July 1, 2024 aṭangin hman ṭan a ni dawn niin Ministry of Home Affairs (MHA) chuan an puang. Heng criminal law bill hi; Bharatiya Nyaya Sanhita, Bharatiya Nagrik Suraksha Sanhita leh Bharatiya Sakshya Adhiniyam te niin, Indian Penal Code, 1860; Code of Criminal Procedure, 1898; leh Indian Evidence Act, 1872 te an thlak dawn a ni.

MHA chuan thuchhuah siamin,"Bharatiya Nagarik Suraksha Sanhita, 2023 (46 of 2023) hnuaia section 1, sub-section (3)-in thuneihna min pek angin, sorkar laipui chuan criminal law thar hman hun atan July 1, 2024 hi a ruat a ni. He dan hman hian Bharatiya Nyaya Sanhita, 2023 hnuaia section 106 (2) tih loh zawng chu a huam ang," tiin an tarlang. Bharatiya Nyaya Sanhita, 2023 hnuaia section 106 (2) hian lirthei khalhtuin mi a sut hlum hnua a tlanchhiat hremna tur a ni a, he dan hi sut turin India rama lirthei khalhtu pawl hrang hrangte chuan an nawr mek a ni.

British hun laia siam, Criminal law bill pathum; Indian Penal Code, 1860; Code of Criminal Procedure, 1898; leh Indian Evidence Act, 1872 te hi nikum August khan ṭhiah a ni a, a thlakna tur bill pathum hi December 12, 2023 khan house-ah Home Minister Amit Shah chuan pu lutin, bill tharte hi pawm a ni. Dan thar pawm takte hman dan turah hian sorkar laipui chuan dan kengkawhtu turte bakah, official leh thubuai ngaihtuahtute training a la pe mek a ni.