LS seat chuh turah Congress leh AAP an inrem

Lok Sabha inthlan lo awm tur atana INDIA-a thawkho, Congress leh Aam Admi Party (AAP) te chuan seat chuh tur insem chungchangah inremna an siam theih thu an puang.

Inremna siam a nih thu hi party pahnihte hian Inrinni khan an puang a, Delhi, Goa, Gujarat, Haryana leh Chandigarh aṭanga Lok Sabha seat awmte hi Congress leh AAP-te hian an insem dawn a ni. Inrinni khan joint press conference neiin, Congress hruaitu Mukul Wasnik chuan Delhi atan bik AAP chuan Lok Sabha seat li chuhin, Congress-in seat thum an chuh tur thu a sawi. Delhi-ah hian AAP chuan New Delhi, West Delhi, South Delhi leh East Delhi Lok Sabha seat-te an chuh dawn a, Congress hian Chandni Chowk, Northeast Delhi leh Northwest Delhi seat te an chuh ve thung ang.

Gujarat-a Lok Sabha seat pahnih; Bharuch leh Bhavnagar-te chu AAP hian an chuh bawk dawn a, a bak seat 24-te chu Congress-in an chuh thung dawn a ni. Haryana-ah Kurukshetra aṭangin AAP-in LS seat hi an chuh dawn a, Congress hian seat dang pakuate an chuh ang. Heng bakah hian Congress hian Goa-a LS seat pahnihte chu an chuh dawn a, Chandigarh-a seat pakhat awm chu an chuh dawn bawk. AAP leh Congress hruaitute hian an party worker-te chu party thutluknaa lawm taka thawkho tura an duh leh beisei thu an sawi a, hetih lai hian Punjab-ah erawh AAP leh Congress hian thawk dun loin, party malin Lok Sabha seat hi an chuh ve ve dawn a ni.