Rajasthan EC-in local body inthlan hun sawn
Rajasthan Election Commission chuan an urban local body 129-a tun thla chhunga inthlan neih tura tih chu, Covid-19 leng avangin October 20-ah a sawn.
Hemi chungchanga thuchhuah an siamah, State Election Commission chuan Indian Constitution-a Article 243K leh 243ZA in thuneihna a pek hmangin, August thlaa urban body inthlan neih tur chu sawn hlat a nih thu a tarlang.
Hemi rual hian October 20-a inthlan hun sawn pawh chu state chhunga hri leng dinhmun azirin ngaihtuah ṭhat leh theih a nih thu a tarlang bawk.
Goa-in inthlan hun thla thumin sawn hla
Goa Election Commission pawhin hri leng avangin municipal body 11-ah October 18-a inthlan neih tur chu thla thumin a sawn hla bawk. Commission chuan online hmanga inthlan buatsaih te a rawt nghal a ni.
State election commission chuan kumin March 22-a zilla panchayat election neih tur, Covid-19 leng vanga ṭhulh chu neih leh hun tur a la rel lo tih a sawi bawk. Municipal body inthlan nena buatsaih rual a tum a ni. State election commissioner RK Srivastava chuan, "Tunah chuan municipal inthlan buatsaih chiah kan ngai rih lo a ni. Voter-te bakah election leh security staff-te dinhmun derthawnga dah chu kan ngam lo a, hei vang hian thla thum atan inthlan hun hi sawn hlat a ni," a ti. Gujarat leh Madhya Pradesh chuan online poll an buatsaih a, hei hi anni pawhin rawtin sorkar chuan a zirchiang mek tih a sawi.