PL hnuai lama awm 5% aiin tlem tawh : NITI Aayog

Sorkar laipui hnuaia NITI Aayog chief executive officer, BVR Subrahmanyam chuan India khua leh tui, Poverty Line (PL) hnuai lama awm chu 5% aiin an tlem tawh tih a sawi.

BVR Subrahmanyam hian Household Consumption Expenditure Survey (HCES)-in 2022-2023 atana survey an neih aṭanga an hmuhchhuah ṭanchhanin, India ramah retheih lutukna chu a bo ṭep tawh niin a sawi a, thingtlang lama sum leh pai dinhmun chhia leh India ṭhanna a tlem anga sawi te chu thil dik lo a nih thu a sawi. NITI Aayog CEO hian kum liam ta lama thil man sang chak anga sawi ṭhin pawh chu thu uarna mai mai a nih thu a tarlang.

HCES survey-a tarlan a nih danin, India ram khawpuite aiin thingtlang lama awmte pawisa lak luh leh hman chhuah a pung nasa zawk. Khawpui leh thingtlanga thil lei dan khaikhinna; 2004-2005-a 91% ni ṭhin chu 2022-2023-ah chuan 71%-ah a tlahniam tawh a, hei hian mi rethei leh hausa inkar zim zel a tilang niin Subrahmanyam hian a sawi. "Ei tur lei nana pawisa hman hrim hrim hi thingtlang lamah hian a tlahniam a ni lo a, ei tur lei nan chauha pawisa hman ṭhin kha a tlem tawh zawk a ni. TV, fridge, phone, leh lirthei lei a pung nasa a, hei hian nunphung inthlak a tarlan rualin, an mamawh ei tur piah lama it zawng lei tura an sum hman hian an sum lak luh a pung a ni tih a tilang" tiin a sawi bawk.