PM-in railway tihchangtlunna tur Rs. vbc 41,000 man project tlangzarh

Prime minister Narendra Modi chuan rel hmanga inkalpawhnain a mamawh chi hrang hrangte thuam ṭhaa, tihchangtlun a nih theih nana hnathawhna tur project, Rs vbc. 41,000 man a tlangzarh. Hemi hmang hian railway infrastructure project 2,000 chuang khawih a ni dawn a ni.

PM Modi hian nimin khan video conference kaltlangin heng project atana sum pek chhuah tur hi a tlangzarh a, Amrit Bharat station scheme hnuaia rel station 553 siam ṭhatna tur lungphum a phum nghal bawk. Heng rel station 553-te hian state leh UT 27 a paltlang a, a siam ṭhat leh chei ṭhat nan hian Rs. vbc. 19,000 ruahman a nih thu union railway ministry thupuangtu chuan a tarlang.

Rel kawng leh rel station-te tihchangtlun dan turah hian PM Modi chuan station chei ṭhat turte chu city centre anga hman an nih tur thu a sawi a, chu chuan khawpui hrang hranga khawpui zia a pholang dawn a ni, a ti. Rel station-a roof plaza siam te, inthiarna hmun changkang leh felfai zawk siam te, naupang infiamna hmun siam te, kiosk leh food court siamte chu he project hnuaiah hian thawh tur niin, environment tana huat tur awm lo leh rualbanlote tan pawha chetna nuam tura buatsaih tum a nih thu a sawi bawk.