Haryana-ah INLD president kap hlum

Haryana-a Indian National Lok Dal (INLD) state president leh MLA vawi hnih lo ni tawh, Nafe Singh Rathee chu Pathianni khan Jhajjar district-a Barahi road-ah mi tu tih hriat lohte'n a SUV lo lambunin an kap a, Rathee hi a hmunah hian a thi nghal a ni. Rathee bakah hian a rual a kal ve, INLD hruaitu pakhat chu thi bawkin, mi dang pahnihin silaia kahna hliam an tuar bawk.

Nafe Singh Rathee-te lo lambuntute hian an chuanna motor hi kawngah lo tidingin, silaiin nasa takin an kap zui nia tarlan a ni. Haryana chief minister, Manohar Lal Khattar chuan pawikhawihtute chu man chhuah thuai an nih theihna tur atana hmalak a nih tur thu leh, an phu tawk hremna pek ngei an nih tur thu a sawi a, police-te pawh a rang lama hnu chhui hna thawk nghal tura a hriattir tawh thu a sawi bawk. Jhajjar Superintendent of Police, Arpit Jain chuan inlambunna chungchang hi crime branch leh speical task force te'n an chhui zui nghal thu a sawi. Rathee beih a nih chungchangah hian Gangster, Lawrence Bishnoi leh a ṭhuihhruai, Kala Jathedi te chu rinhlelh an ni a, mahse, thu chiang engmah a la awm lo thung.

Rathee hi Haryana minister hlui pakhat fapa, Jagdish Rathi intihhlum chungchanga intihlum tura fuihtu leh puitu nia puhin, a lakah hian January 2023 khan thubuai ziah luh a lo ni tawh a, mahse, high court-in anticipatory bail hmangin a chhuah a ni. INLD media co-ordinator, Rakesh Singh chuan Rathee hian thla eng emaw zat chhung chu thaha vauna a dawng tawh niin a sawi a, hei vang hian thuneitute hnenah pawh venhimna pek a lo dil tawh bawk a ni, a ti.