Maratha quota chungchanga nawrhna avangin curfew puang

Maharashtra state assembly-in Maratha quota a siam dan avanga lungawi loin, activist Manoj Jarange chuan nawrh huaihawt tura Mumbai pan a tum thu a puang a, mahse, a nawrh tum a puan hnuah Jalna district-a Ambad taluka thuneitute chuan curfew an puang zui ve nghal.

Jalna DC, Srikrushna Panchal chuan Maratha hnamte tana reservation siam dan chungchanga Manoj Jarange-a'n chaw ngheia nawrh a tum thu a sawi avangin amah thlawptute hi Ambad taluka-a Antarwali Sarati khuaah pun khawm an tum nia hriat a ni a, hei vang hian buaina a chhuah hlauhthawn thilah curfew hi puan a nih thu a sawi. Jalna district-a curfew puan a nih bakah hian Jalna, Sambhajinagar leh Beed district-ah te chuan internet tihtawp a ni. Curfew thuchhuahah hian Ambad chhehvela Dhule-Mumbai highway leh tehsil-ah te traffic a jam hlauhna a awm thu tarlan a ni bawk. Jalna DC chuan curfew chu thu leh awm hma chuan hman tur a nih thu sawiin, hei hian sorkar office, zirna in, highway-a lirthei tlan, bawnghnute semtu, chanchinbu mite leh damdawi ina thawkte a huam loh thu a sawi.

Manoj Jarange hian Mumbai-a kal a, deputy CM kawta nawrh a tum thu hi a sawi a, hei hi kar liam ta Thawhlehnia Maharashtra assembly-in Maratha hnamte tana sorkar hna leh zirna ina an puala 10% reservation an neihna tur a pass tak chungchanga a lungawi loh vang a ni.

Jarange hian Maratha hnamte tana 10% reservation hran siam lo hian, Other Backward Class (OBC) hnuaia Maratha hnam chu dah a, reservation siam a phut a ni.