Congress-in Agnipath scheme an tihtawp tur thu sawi

Congress party president, Mallikarjun Kharge chuan central-ah sorkarna an siam a nih chuan Agnipath scheme an tihtawp tur thu leh, tun hmaa sipai lak ṭhin dan pangngaia sipai lak an kalpui leh tur thu a sawi.

Congress hian sorkar laipuiin 2022-a Agnipath scheme a tlangzarh avanga ṭhalai nuai hnih chuang, sipaia lak tura tling vek tawh, lak ni leh si lote tan hna pek an phut thu an lo sawi tawh a, hemi chungchangah hian Kharge hian president Droupadi Murmu hnenah, Supreme Commander of the Indian Armed Forces a nihna anga lehkha thawnin, heng ṭhalaite tana rorelna dik pek a phut thu a ziak a ni.

Kharge hian Agnipath scheme tlangzarh a nih avanga sipai atana lak ni leh ta lo ṭhenkhatte a kawm thu leh, 2019 leh 2022 chhungin ṭhalai mi nuai hnih chuang chu Army, Navy leh Air Force atana tling vek siin, appointment letter pek an ni lo niin a tarlang. "Heng ṭhalai mipa leh hmeichhiate pawh tiam hian, rilru leh taksa bakah exam hautak tak an paltlang a, May 31, 2022 thleng kha chuan beiseina sang tak nen, an suangtuahna puitlina inngaiin appointment letter an nghak a ni. Chutih laiin sorkar laipui chuan Agnipath scheme tlangzarhin, hna lak dan ṭhin chu a rawn titawp vek a, an tan engkim tihtawp a ni ta bawk a ni," a ti.

Congress President hian sipai lak dan phung hlui hman leh a nih tur thu hi All India Congress Committee (AICC) headquarters-a joint press conference neihnaah a sawi a, party general secretary, Sachin Pilot leh Rajya Sabha MP, Deepender Hooda te chuan Agnipath scheme mamawhna leh duhna hi mipui lam aṭanga a awm ngai loh thu an sawi bawk. Sachin Pilot chuan Agnipath scheme hian nakin zel atan India sum leh pai tlemte lo hum bak ṭhatna a neih loh thu sawiin, Hooda pawhin Agnipath hnuaia lak sipai, Agniveer-te chu kum li an service zawh hnua an tih chhunzawm tur zawhnaah, BJP hruaitu, Kailash Vijayvargiya chuan BJP office-a chowkidar tur an ni tih a sawi thu a tarlang ve bawk.