Election Commission-in IBA leh DoP inremna ziahpui

Vote thlak chungchanga mipuite zirtirna nasa zawka kalpui a nih theih nan, Election Commission (EC) chuan Indian Banks’ Association (IBA) leh Department of Posts (DoP) te chu Memorandum of Understanding (MoU) a ziahpui.

Chief Election Commissioner, Rajiv Kumar chuan IBA leh DoP te nena MoU ziahna hun hi a kaihruai a, inremna ziaha tarlan a nih danin, IBA leh DoP te hian an hnuaia thawkte leh an unit hrang hrangte kaltlangin voter-te'n an hriat tur thil pawimawh chi hrang hrang bakah, vote thlak chungchanga an chanvo te, vote thlak kalphung leh vote thlak tura an mawhphurna zirtirnate an nei ṭhin dawn a ni. IBA leh DoP hnuaia institution hrang hrangte chuan website, social media leh TV channel-a mipuite zirtirna lam hawi an tarlan ṭhin dawn bakah, poster leh hoarding siama office hmunhmaahte an tarlan ṭhin tur thu an sawi bawk. DoP hian vote thlak chungchang inzirtirna cancellation stamp an siam dawn bawk a ni.

EC-in a sawi danin, 2019 Lok Sabha inthlanah khan India rama vote nei, mi vbc. 91 aṭangin, mi vbc. 30 velin vote an thlak lo a, vote tla zawng zawng hi 67.4% anga chhut niin, Lok Sabha inthlan leh hunah chuan hei aia percentage ṭha zawk nei thei tura an inbuatsaih tur thu an sawi. EC hian zirna in hrang hranga voter-te dikna chanvo inzirtirna uar zawka neih a nih theih nan union education ministry nen MoU an lo ziak tawh bawk a ni.