Hmeichhe tleirawlte anaemia laka venna tur project tlangzarh

Sorkar laipui hnuaia Ministry of Ayush leh Women and Child Development te chuan thawhhona thuthlung ziakin, ayurveda hmanga hmeichhe tleirawlte anaemia laka venna tur 'Mission Utkarsh' an tlangzarh. Project thawh dunna tur ziahnaah hian Ayush minister, Sarbananda Sonowal leh Women and Child Development minister, Smriti Irani te an tel.

Mission Utkarsh Phase 1-ah hian state panga; Assam, Chhatisgarh, Jharkhand, Maharashtra leh Rajasthan-a district thlan bik panga; Dhubri, Bastar, Pachimi Singhbhum, Gadchiroli leh Dhaulpur-a hmeichhe tleirawl (kum 14-18 inkar) te chu ayurveda damdawi enkawlna hmanga anaemia vei thei dinhmun aṭanga lak chhuah tum a ni ang. He project hian district pangaa anganwadi 10,000 a huam dawn a, anaemia hluarna district-a hmeichhe tleirawl 95,000 tal ven theih a tum dawn a ni.

District pangaah Mission Utkarsh hi bul ṭan nan kalpui ṭan phawt tura ruahman a ni a, central ministry leh department 15-te chuan district hnuaihnung zualte chu rampum huap hriselna khaikhawmna level-a chawi kang tura an thawh dawn bakah, he project kaltlang hian khawtlangin hriselna lama hmasawnna hmel thar a hmuh theih beisei a ni. Anaemia hi dan pangngai aia Red Blood Cell (RBC) tlachham, taksaa thisen kaltlanga oxygen keng kualtu tlakchhamna niin, hei hi thla tin hun bi neia thisen chhuak ṭhin, hmeichhiate hian an neihna chance a sang bik a ni.