Rajya Sabha inthlan: BJP-in seat 15 aṭangin seat 10-ah hnehna chang

29th February, 2024

Rajya Sabha seat ruak hnawhkhahna atana Thawhlehnia state pathum; Uttar Pradesh, Karnataka leh Himachal Pradesh-a seat 15-a inthlanna neihah, Bharatiya Janata Party (BJP) chuan seat 10-ah hnehna changin, Congress-in seat pathum an la a, Samajwadi Party (SP) chuan seat pahnihah hnehna an chang ve bawk.

Uttar Pradesh-ah hian Rajya Sabha seat 10 atan inthlanna neih a ni a, BJP chuan candidate pariat neiin hnehna an chang vek a, hei hi hnehna chan theih zat tura an inbeisei zat aiin pakhatin a tam. Uttar Pradesh-ah hian SP chuan candidate pathum nei ve bawkin, seat pahnih an la a, SP candidate pakhat hi vote thlak hmain a inhnukdawk a ni. Karnataka-ah chuan Rajya Sabha seat pali atan inthlan a ni a, Congress-in seat pathum lain, BJP chuan seat pakhat an la ve bawk. Himachal Pradesh-ah hian seat pakhat atan inthlan hi neih niin, BJP chuan hnehna an chang bawk a ni.

Tun ṭum inthlanah hian an party candidate ni lo vote avanga buaina a nasa hle a, Karnataka BJP-te chuan assembly speaker hnenah an party candidate ni loa eptu party candidate vote-tu, an MLA pahnihte chungchangah complaint an theh lut. Himachal Pradesh-ah pawh rorel lai Congress candidate, Abhishek Singhvi chuan hnehna chang zo loin, hei hi Congress MLA paruk laiin BJP candidate, Harsh Mahajan an vote vang nia tarlan a ni bawk.

Rajya Sabha-ah hian seat 238 a awm a, state hrang hrang aṭangin Rajya Sabha seat 56 ruak tur awmin, kumin April-ah hian an term zawh avangin an chhuak dawn a ni. Heng seat ruak tur; Maharashtra (seat 6), Bihar (seat 6), Madhya Pradesh (seat 5), West Bengal (seat 5), Gujarat (seat 4), Odisha (seat 3), Telangana (seat 3), Andhra Pradesh (seat 3), Uttarakhand (seat 1), Haryana (seat 1), Chhattisgarh (seat 1) leh Rajasthan (seat 3)-ah te hian inthlanna hi neih a ni tawh a, kar hmasa khan heng state aṭanga Rajya Sabha seat 41-a candidate-te chu khingtu awm loh avangin tlinga puan an lo ni tawh a ni. Tun dinhmunah Rajya Sabha-ah hian BJP chuan member ngah berin, member 97 an nei a, NDA-a an thawhpuite nen member 117 an nei a ni. Congress chuan member 29 nei bawkin, INDIA-a an thawhpuite nen member 89 an nei ve bawk. Rajya Sabha-ah hian majority nei turin seat 121 neih a ngai a ni.