Sorkar laipuiin J&K-a Jamaat-e-Islami khapna pawtsei

Union Ministry of Home Affairs (MHA) chuan Jammu & Kashmir-a Unlawful Activities (Prevention) Act (UAPA) 1967 hmanga phal loh pawla a puan tawh, Jamaat-e-Islami (JeI) khapna chu kum nga chhung atan an pawhsei thu an puang.

Union home minister, Amit Shah chuan hemi chungchang hi X-ah tarlangin,"Prime Minister Narendra Modi-a'n firfiaka chetna leh inṭhen hranna hawi zawnga chete laka zahngaihna lantir lo tura a hmalakna kal zelah, sorkar laipui chuan J&K-a Jamaat-e-Islam khapna chu kum nga chhung atan a pawtsei a ni. He pawl hi ram inpumkhatna leh rorelna tichhia a, ram himna atana hlauhawm thei thilah an inhnamhnawih nia hriat a ni a, February 2019 khan an pawl khapna hi puan a ni tawh. Ram himna atana pawi thei thila inhnamhnawih nia hriatte reng reng chu na taka hrem an ni zel ang," a ti. JeI khapna pawhsei a nih chungchanga thuchhuahah hian MHA chuan JeI laka thubuai ziah luh 47 zet an tarlang tel a ni.

JeI hi Jammu & Kashmir-a awm an ni a, helpawl thlawptu, India dodala Jammu & Kashmir-a inṭhen hranna hawi zawnga che ṭhin an ni a, hei hi India himna leh inrelbawlna kawngah harsatna thlen theitu niin sorkar laipui chuan an sawi.