2035-ah India-in space station a nei tawh ang : PM Modi

Prime minister Narendra Modi chuan Thawhlehni khan Vikram Sarabhai Space Centre (VSSC), Thiruvananthapuram-a Gangayan mission-a kal tur astronaut-te hming tlangzarhna hun hmanpuiin, Indian Space Research Organization (ISRO) scientist-te hmaah thu a sawi bawk.

He hunah hian PM Modi chuan India chu Thlaa a la lawn leh tur thu leh, 2035-ah chuan India-in ama puala space station a neih tawh tur thu a sawi. PM hian ISRO chuan Venus-a kal theihna tur pawh an ngaihtuah mek thu leh, Amrit Kaal kalpui chhung ngeia mihring tela Thlaa inkah kai leh tum a nih thu a tarlang. Gangayan mission-a kal tur astronaut-te chu India mipuite beiseina kengtu an nih thu leh, kum 40 zet hnua khawvel pawn lama India mi an kal lehna hmasa ber a nih dawn avanga a phur thu PM hian a sawi bawk a ni.

ISRO tarlan danin Gangayan mission hi khawvel pawn, Low Earth Orbit (LEO) china mihring thawn chhuah tumna a ni a, hei hian nakin zela khawvel pawn zirnaa India-in hma a sawn nan leh, tualchhung thiamna leh theihna hmang ngeia khawvel pawna kal theih a tumna tihpuitlinna a nih thu an sawi. Gangayan mission atana hmanraw hman tam zawk hi India kutchhuak liau liau niin an tarlang bawk. Gangayan mission atan hian Indian Air Force (IAF) aṭangin mi pali hming puan an ni.