Bengal CM-in PM Awas Yojana sum pe vat turin sorkar laipui hriattir

West Bengal chief minister, Mamata Banerjee chuan Pradhan Mantri Awas Yojana hnuaia sorkar laipuiin a sum batte April 1 hmaa a pe chhuak lo a nih pawhin, a kaihhruai sorkar chuan an state-a mi retheite tan in nuai 11 a sak tur thu a sawi.

Mamata Banerjee chuan centre-a BJP kaihhruai sorkarin state tana central scheme fund a pe chhuak duh lo chu na takin a sawisel a, PM Awas Yojana sum chu pe chhuak vat tura a duh thu a sawi."Sorkar laipui hian PM Awas Yojana sum hi April 1 ral hmaa a pe chhuak dawn lo a nih chuan, he scheme hnuaia inziak lut, West Bengal state-a mite zawng zawng tan state sorkar chuan, in nuai 11 a sa ang. State sorkarin sum hi a tum ang. Kutdawh kan ni lo a, kan chanvo min pek kan duh mai a ni," tiin a tarlang.

Sorkar laipui hian West Bengal tana Mahatma Gandhi National Rural Employment Guarantee Scheme (MGNREGS) sum pawh a pe chhuak duh loa , MGNREGS sum hi kum hnih zet a pe chhuak tawh lo a ni. Mamata hian MGNREGS hnuaia inziak lut hi an state-ah mi nuai 50 chuang an awm niin a sawi.