Bank-in Mallya rawtna hnawl

Kingfisher Airlines neitu Vijay Mallya chu April 22 khian Supreme Court hma-ah a inlan dawn tih a sawi.

Court chuan Ningani khan Mallya hi Bank hrang hrang 17 hnena a leiba vaibelchhe 9,000 zet chu rul ṭhen turin a hriattir a ni. April 22 khian Mallya hi Court-ah a inlan dawn a, leiba eng zat nge a rulh theih dawn tih hriattir turin thu a pe. He tih lai hian Mallya-a counsel chuan India-a rawn let tur hian harsatna an nei niin a sawi.

State Bank of India (SBI) chuan Ningani khan Mallya an Semtember-a vaibelchhe 4000 a pek theih tur thu a sawi chu an pawm lo tih an sawi. March 31 khan Mallya hian Apex court-ah a leiba vaibelchhe 2,000 a lo chawi tawh a, vaibelchhe 2,000 dang septem ber-ah a pek leh thei tur thu Justices Kurian Joseph leh R F Nariman te hma-ah a lo sawi tawh a ni.

He mi chungchanga Mallaya rawtna hi an pawm leh pawm loh April 7 hma-a sawi turin Court chuan SBI chu hriattirna a pe a, an pawm thei loh thu an sawi ta a ni. Kingfisher Airlines SBI-ah hian leiba vaibelchhe 1,600 a nei a, PNB leh IDBI Bank-ah vaibelchhe 800 ve ve, Bank of India-ah vaibelchhe 650, Bank of Baroda-ah vaibelchhe 550 leh Central Bank of India-ah vaibelchhe 410 te a ni. Heng bakah hian UCO Bank-ah vaibelchhe 320, Corporation Bank-ah vaibelchhe 310, State Bank of Mysore vaibelchhe 150 , IOB vaibelchhe 140, Federal Bank vaibelchhe 90, Punjab & Sind Bank vaibelchhe 60 leh Axis Bank-ah vaibelchhe 50 te leiba a nei a ni.