Loneitu 50,000 te'n Tractor-in Delhi pan
Sorkar laipui Farm law siam thar duh lohna lantira nawrh huaihawt mek, loneitute chuan nawrh tihtawp mai an la tum lo.
Nimin khan Punjab-a district hrang hranga loneitu 50,000 vel chuan tractor 1,200 hmangin nawrh huaihawtna hmun Delhi an pan belh leh. Ei tur pawh thla ruk daih tur an keng tel nghal a ni.
Mazdoor Sangharsh Committee hotu, Satnam Singh Pannu chuan loneitute chuan thih pawh inhuamin Delhi hi an pan tih a sawi. "Modi-a kaihhruai sorkar chuan min tihhlum a tum dan tur hi a tihfel mai a ngai a ni," a ti. Delhi pana kalte hi Ferozepur, Fazilka, Abohar Faridkot leh Moga district-a loneitute an nih thu a sawi.
Ramchhunga loneitu pawl hrang hrangte chuan farm law duh lohna lantirin, Delhi border hrang hrangah nawrh an huaihawt a, nimin kha nawrh an huaihawt ni 16-na a ni. Nawrh huaihawtte zawm tur hian Punjab bakah Haryana aṭangin loneitu eng emaw zatin Delhi an pan mek bawk.
BJP-in farm law thlawpna campaign nei dawn
Bharatiya Janata Pary (BJP) chuan Farm Law thar thlawpna lantirin, rampum huap campaign pui tham tak neih a tum.
Centre-a rorellai, BJP chuan he dan siam thar ṭhatna leh, loneituten an hlawkpui zawk dan tur hrilhhriatna neiin campaign hi neih a tum a ni. Campaign hi district 700-ah neiin, hemi chhung hian press conference vawi 100 bakah loneitute nen meeting ṭum 700 buatsaih an tum.
BJP campaign buatsaihah hian cabinet minister-te pawh an tel dawn tih party lam thuchhuak chuan a tarlang a, farm law chung changa mipuiten an hriat fiah tawk lohte an sawichiang dawn a ni.
Loneitute sum lakluh tihtlem sak duhah BJP puh
Congress hruaitu Rahul Gandhi chuan farm law chung changah nimin khan BJP kaihhruai sorka laipui chu bei lehin, loneitute sum lakluh chu tihtlem sak a duh zawk a ni, a ti.
Rahul Gandhi chuan ram chhunga loneitute zingah Punjab amite sum laluh chu a sang ber a, Bihar amite an hniam ber thung tih a sawi. "Loneitute hian Punjab amite sum lakluh ang zat hi lakluh ve an duh hlawm a ni. Mahse Modi-a sorkar chuan Bihar loneitute sum lakluh zat anga ramchhunga loneitute sum lakluh zawng zawng chu tihhniam sak a duh zawk a ni," tiin a sawi.
Zirchianna aṭangin ram chhunga loneituten hian chawh rualin kum khatah Rs 77,124 lalut ang an ni. An zingah Punjab-a loneitu chhungkaw kum khat sum lakluh chu Rs 2,16,708 a nih laiin, Bihar amite sum lakluh chu Rs 42,684 chauh a ni thung.