Gen. Naravane leh UAE Land Forces Commander inbia

Chief of Army Staff General MM Naravane chuan United Arab Emirates (UAE) Land Forces Commander leh Staff Major General Saleh Mohammed Saleh Al Ameri chu hmuin ram pahnih defence lama an thawh dunna tur chung chang a sawipui tih nimin khan Indian Army chuan thuchhuah siamin an tarlang. 

Gen. Naravane hi UAE leh Saudi Arabia tlawh kualin ni ruk chhung tour a nei dawn a, Gulf ram pawimawh pahnih Indian Army head-in official-a a tlawh vawi khatna niin Indian Army-in an tarlan dan chuan Gen. Naravan hian Nilaini khan UAE Land Force headquarters-ah Guard of Honour a dawng nghe nghe a, Martyr point-ah pangpar ṭhi a dah bawk a ni. 

Indian Army Additional Directorate General of Public Information chuan nimin khan twitter-ah Gen. Naravane-a'n General Saleh Mohammed Saleh Al Ameri inbiakna a neihpui chungchang hi tarlangin, Ningani khan  Land Forces Institute, Infantry School leh Armour School a tlawh thu pawh an tarlang bawk.

Army Chief-in UAE a tlawh chhan ber hi ram pahnihin defence lama thawhdunna ṭha an neih theihna tura hmalakna a nih thu Indian Army chuan an sawi a, ruahman lawk ang chuan Pathianni leh Thawhṭanni hian  Saudi Arabia a tlawh leh dawn a ni.