Lok Sabha election 2024 : Maharashtra eptu pawlten seat insem dan tur tifel ; BJP-in candidate list hmasa ber puan thuai tum

Lok Sabha inthlanpui neih tur atan political party hrang hrangte ngawrh takin an inbuatsaih mek a, candidate tur pawh tihfel thuai tumin ṭan an la chho hle.

Maharashtra-ah eptu ṭangrual pawl, Maha Vikas Aghadi chuan Lok Sabha seat an chuh tur an insem fel thei ta. Chief minister hlui Udhav Thackeray kaihhruai Shiv Sena lam chuan an state-a Lok Sabha seat 48 awm aṭangin seat 20-ah an chuh dawn a, Congress party-in seat 18 leh Sharad Pawar kaihhruai Nationalist Congress Party in seat 10-ah an chuh bawk ang. Regional party, Vanchit Bahugan Aghadi chuan seat panga an phut a, mahse seat pahnih pek niin hei hi Sena share aṭangin pek leh chhawn anni ang. Independent-a chuh tum, Raju Shetty chu NCP hian thlawp a tum bawk.

Kum 2019 inthlanpuiah khan Shiv Sena (an inṭhendarh hma) chuan seat 28-ah chuhin seat 18-ah hnehna an chang a, Congress-in seat 25 chuhin pakhatah chiah an chak a, NCP pawh an inṭhendarh hma niin seat paliah hnehna an chang. BJP chuan seat 25 a chuh aṭangin seat 23-ah hnehna a chang a ni.

Kumin inthlanpuiah hian BJP hi chief minsiter Eknath Shinde kaihhruai Shiv Sena pawl lehlam leh, deputy chief minister Ajit Pawar kaihhruai NCP pawl phel lehlamten an thlawp dawn a ni.

BJP chuan Ningani zan dar 11 aṭanga nimin zing dar 4 thleng khan Delhi-a Prime Minister chenna inah meeting neiin, Lok Sabha 2024 inthlanpui neih tur atana an candidate turte an thlang a, candidate list hmasa ber hi puan chhuah thuai an tum. List hmasa berah hian party candidate tur 100 chuang hming puan an tum a, an zingah hian prime minister Narendra Modi leh union home minister Amit Shah hming pawh a tel ang. BJP hian a term thumna atan central-a thuneihna chan leh ngei tumin ṭan an la nasa hle a, MP nilaite pawh an berawn nasa hle.

Ningani zana meeting neihah hian UP, Uttarakhand, Madhya Pradesh, Chhattisgarh, Rajasthan leh Gujarat bakah, chhim lama state - Kerala leh Telangana chungchang an ngaihtuah a, state dang - Andhra Pradesh, Punjab, leh Tamil Nadu lam erawh an thawhpui tur, regional party-te nen inbiakna an la nei leh dawn a ni. March 10 hmain an candidate 50% chu puan hman an tum. Kum 2019 inthlanpui neih dawn pawh khan BJP hian inthlan neih hun tur puan hmain, March 21-ah an party candidate tur mi 164 hming a lo puang hmasa a ni.