India ramah khawlum vangin mi 100 chuang thi tawh

Nipui khawlum zual zel chuan India chhim lam a tuam zel a, Telangana leh Andhra Pradesh-ah mi 111 in nunna an chan tawh. Telangana-ah mi 66 leh Andhra Pradesh-ah mi 45 an thi.

Telangana disaster management department tarlan danin khawlum tuar loa thi hi Mahabubnagar district-ah tam berin mi 28 an tling a, Medak district-ah mi 11 an thi tih a ni. Nizamabad-ah pasarih, Khammam leh Karimnagar-ah pali ve ve, Adilabad leh Warangal bialah pali ve ve niin Nalgonda-ah pahnih an thi bawk.

Met department chuan ningani khan Telangana chhunga khawlum ber ṭum a thleng a; Nalgonda, Hanamakonda, Khammam, Mahabubnagar leh Ramagundam-ah chuan 41 degree Celsius a kai hial a ni.

Mi 45 in khawlum vanga nunna an channa Andhra Pradesh-ah chuan Deputy Chief Minister N Chinna Rajappa sawi danin, YSR Kadapa district-ah mi 16, Prakasam-ah 11, Anantapur-ah mi pali, Vijayanagaram, Chittoor leh Kurnool bialah pathum ṭheuh, Srikakulam leh Krishna districts pahnih ve ve, West Godavari district-ah pakhat an thi.

N Chinna Rajappa chuan sorkarin khawlum tuartute tan theihtawp a chhuah zel dawn tih sawiin, damdawi in te pawh inbuatsaih lawk tura hriattir an nih tawh thu a sawi. Oral rehydration salts leh thisen chaw (IV) te pawh mipui hman theih turin an chhawpchhuak tawh.

Mipuite pawh pawn khawluma teichhuak lo turin thurawn an pe tawh a, a bikin chhun dar 12 leh tlai dar 3 inkarah nisa tuar lo turin an ngen. Met department chuan kumin hian kum dang zawng aiin khawlum a zual dawn niin an sawi. Nikum chhung khan India ram pumah khawlum vanga nunna chan mi 2000 dawn an awm a ni.