Kerala Kollam Temple bula thil puak vangin mi 106 thi tawh

Nimin Pathianni zing dar 3 vel khan Kerala-a Kollam khua Puttingal Devi Temple bula, kumthar lawmna hun hmangtute punkhawmnaah halpuah lam chi puak vangin mi 105 velin nunna an chan a, hliam tuar 383 an awm tawh. President Pranab Mukherjee, Prime Minister Modi, Sonia Gandhi leh mi lar tam takin tawrhpuina thu an sawi. Prime Minister Narendra Modi chuan thil thlenna hmun hi nimin khan a pan nghal a, official anga hmuah leh lawm a duh loh thu a sawi.

Inrinni zan, zanlai aṭang khan kumthar hmuaktu mi sang chuang pungkhawm in halpuah leh halmawi hi an thlir a, kumthar lawma hlimna chu zing lam dar 3:30 velah buai philinain a thlak ta niin Police te chuan an sawi.

Van lama halmawi leh halpuah thlawk chho lo tla leh chu puakthei dahna inah a tla a, hei hi puak nghalin kangmei nasa tak a siam a ni.

Halpuah dah khawmna kang hi a nasa hle a, km 1 aṭang pawhin a hriat theih niin an sawi. Current a thim nghal vek a, mipuite chu sahimna zawngin an phili buai hle a ni. Halpuah dahna kang hian inchung leh bang a thlawh darh nasa hle a, km 1 vela hlaa Bike khalhtu pakhat a deng hlum hial niin police te chuan an sawi.

Kerala chief minister Oommen Chandy sawi danin, hriattheih chinah mi 106 an thi tawh a, hliam tuar 280 an awm. Police, state disaster management team leh kangṭhel pawlte chuan a hmun hi an vil nghal chawt a, chhanchhuahna leh chhawmdawlna an buaipui nghal a ni.

Navy leh Air Force te chuan thlawhtheihna hmangin hliam tuarte hi damdawi in an panpui bawk.

Prime Minister Narendra Modi chuan thil thleng chu lungchhiatthlak a tih thu sawiin, nunna chanta chhungte leh hliam tuarte a hriatreng tur thu a sawi. Nunna chanta chhungte hnenah zangnadawmna cheng nuai hnih ṭheuh leh hliam tuar tan Rs 50,000 ṭheuh pek an nih tur thu a puang. Hliam tuarte leh nunna chan chhungte hi Vun doctor hruaiin nimin khan a pan nghal.

President Pranab Mukherjee pawhin nunna chante a ui thu sawiin, state sorkar leh ṭanpuitu pawl dangten hliam tuar leh chhiatna tawk chhungkua te theihtawpa pui turin a ngen.

Congress President Sonia Gandhi pawhin chhiatna thleng chu pawi a tih thu leh thinlung taka a tawrhpui thu a sawi. District collector A Shainamol chuan "halpuah emaw halmawi emaw hal tur hian phalna pek an ni lo" a ti. Temple thuneitute hian phalna chu an dil ngei a, mah se pek an ni lo a ti.

Kerala CM Oommen Chandy leh minister dangte chuan nimin zingkar khan thil thlenna hmun hi an tlawh nghal a, nimin tlai dar 3 khan Cabinet meeting a n nei. CM Oommen Chandy chuan nunna chan chhungte hnenah z^ngnadawmna cheng nuai 10 ṭheuh leh hliam tuarte hnenah cheng nuai hnih ṭheuh state sorkarin a pek tur thu a puang. He chhiatna thlen chhan hi Judicial Inquiry hmanga chhui tur a nih thu a sawi.

Kerala Home Minister Ramesh Chennithala pawhin thil thlen chhan chhuichhuak nghal turin thu a pe a, police te chuan he thil thleng vang hian thubuai an ziak lut nghal. Temple thuneitute leh halpuah haltute hi man an nih tur thu an sawi. Halpuah haltu (contractor) hi thi zingah a tel niin Report
ṭhenkhat chuan an sawi. Temple thuneitute chu thil thlen hnu hian an bibo vek niin sorkar thuneitute chuan an sawi.Police ten nimin zingah an enchianna ah halpuah lian chi puak lo engemaw zat an hmuchhuak bawk.

Kerala Chief Secretary pawhin Election Commission hnenah he thil thleng tuartute ṭanpuina sum pekchhuah phalsak turin a ngen. Kerala-ah hian May 16 ah inthlanpui an nei dawn a, model code of conduct puan a nih tawh vangin ECI hnenah phalna dil a ngai a ni. ECI hian Chief Secretary hnenah a thuphungin phalna a pe tawh.

Kerala Health Minister V S Sivakumar chuan sorkar leh mimal damdawi inah hliam tuarte hi a thlawn vek a enkawl an nih tur thu a sawi. BJP president Amit Shah pawhin vantlang punkhawma thu a sawi tur pawh
ṭhulh nghalin, nimin chawhnu lam khan Kollam hi tlawhin, Trivandrum Medical College a hliam tuar dahte a kan.