Mamata Banerjee-in PM Modi a chhanglet

Trinamool Congress hotunu leh West Bengal chief minister ni bawk, Mamata Banerjee chuan Prime Minister Narendra Modi thusawi chhangletin, amah leh an party eirukna a hmu a nih chuan Jail-a khung mai turin a cho.

"PM hi tunhma leh tunhnu thlenga dawt sawi hrat a ni. A duh chuan lunginah min khung chhin se, inthlan hmachhawn dun ila ka sawp nek tho ang" a ti.

Tun hnai khan West Bengal-a campaign a neihah Prime Minister Modi hian Mamata chu eirukna nena inzawm, hmasawnna changchawia mipui hruaikawitu a ni a ti. TMC ho innghahna chu "Hlauhna, eirukna leh thihna" a ni a ti bawk.

West Bengal inthlanpui neih turah CPI(M) leh Congress thawk dun tur chu Mamata chuan sawiselin, " Congress hian amah maiin inthlan a hmachhawn ngam lo a, sangawi zawnpui atan CPI(M) sawm mai loh chu tihtheih an nei lo. CPI(M) in kum 34 zet thuneihna an chelh chhung khan an thil tihdik loh chu an larna ber a ni. An ni pahnih (Congress leh CPI-M) hi dawt thu ang chauh an ni. Hna thawh sawi tur an nei lo" a ti.