Prince William leh Kate Middleton India ramah lokal

England Lal Fapa Prince William leh a nupui Kate Middleton chuan a vawi khat nan nimin khan India leilung an rawn rap. Duke leh Duchess of Cambridge te hi nimin chhun khan Mumbai an lut a; Taj Palace Hotel, 26/11-a chhiatna thlenga nunna chante hriatrengna hmun tlawhin zahna chibai an buk.

Zahna pangpar an hlan hnu hian, kum 2008 a firfiakin hotel an beih laia thawktute an kawm nghal. Lal Fapate nupa hi ni sarih an cham dawn a, India leh Bhutan an tlawh ang. England leh ram pahnihten inlaichinna nghet an neih theih nana lokal an ni.

Taj Palace Hotel an tlawh hnu hian Oval Maidan-ah Mumbai-a tlawmngai pawl pathum Magic Bus, Doorstep, leh India Childline-a thawktute leh an enkawlte cricket khel an en nghal. Tlai lamah sumdawng lian leh Bollywood star larten anmahni lawmna chawhlui an buatsaih an chhim.

Vawiin hian Delhi panin Mahatma Gandhi thlan an tlawh bakah sipai hoin an mahni lawmna an buatsaihah an tel ang. Kum 24 kaltaa Princess Diana-in a lo tlawh tawh Taj Mahal an tlawh bawk ang.

Lal fapate nupa hian Assam-a Samak ki pakhat nei awmna, Kaziranga National Park tlawhin, ramsate humhalh nana thingtlang mite pawimawh zia an zirchiang ang. Sahuan bul hnaia chengte leh ramsaten engtin nge nun khawchhuah nan an beih tih chu an hriat chak zawng tak a nih avangin Kaziranga sahuan vengtu (rangers) te kawmin, sa pelrutu lak ata Samak an hum dan an zawt ang. Hemi hnu hian tlang ram mawi tak leh boruak thiang tak dawng tur≠in ram hmasawnna aia ram mipuite hlimna dah pawimawh hmasa zawk ṭhin Bhutan an pan ang.