Madhya Pradesh-ah Bharat Jodo Nyay Yatra chhunzawm

Congress party hruaitu Rahul Gandhi kaihhruai, Bharat Jodo Nyay Yatra chu hun eng emaw chen chawlh lailawk a nih hnuah Inrinni khan chhunzawm a ni a, nimin khan Madhya Pradesh-a Morena-ah leh Gwalior-ah te thu a sawi.

Rahul Gandhi hian Morena-a thu a sawinaah central-a rorel lai, BJP sorkar chu Agniveer kaltlanga sipai a lak danah sawiselin, ram venhimna atana hman tur sumte chu sumdawng ṭhenkhat kutah a awm tawh a ni, a ti. Gandhi hian Lok Sabha inthlan lo awm tur atan Congress chuan loneitute tana Minimum Support Price (MSP) atana dan siamna tur chu an manifesto zinga an telh thu a sawi bawk. "Agnipath scheme kalpui a nih hnu hi chuan martar chi hnih an awm tawh ang. Martar chi khat zawk hi Agniveer a nih chuan martar anga sawngbawl ni tawh loin, pension a nei tawh lo ang. Hei hi sorkar laipuiin ram venhimna atana sum ruahmante, sipaite tana sen ai chuan sumdawng liante hnena pek a duh zawk vang a ni," tiin, Agnipath kaltlanga lak, agniveer-te chuan pension emaw, canteen hamṭhatna ang chi leh, zahna tak ngial emaw pawh an hlawh tawh loh tur thu a sawi.

Ralthuam siamna lam hi sorkar hian mimal kuta hlan a tum niin Rahul Gandhi chuan a tarlang a,"Tun hma chuan sipaite mamawh leh an ralthuam zawng zawngte hi sorkar hriatpui leh enkawl Hindustan Aeronautics Limited (HAL) tihte'n an siam ṭhin. Tunah chuan Adani te'n silai leh hmanrua bakah ralthuam dang pawh an siam tawh thung ang", tiin a sawi bawk.